Parlament Májilisiniń tóraǵasy Nurlan Nyǵmatýlin palatanyń 2021 jylǵy jumysyn qorytyndylady, dep habarlaidy QazAqparat.
«Búgin biz 2021 jyldyń qorytyndy jalpy otyrysyn ótkizip otyrmyz. Sondyqtan osy jyldyń jáne jalpy ekinshi sessiianyń keibir nátijelerine toqtalmaqpyn. Erekshe aitý kerek, az ýaqyt buryn Qazaqstan Táýelsizdigine 30 jyl toldy. Osy 30 jyldyń árbir belesi biz úshin qaitalanbas tarih. Bul jolda bizdiń Parlament ózine júktelgen jaýapkershilikti abyroimen atqaryp, elimizdiń saiasi-ekomikalyq, áleýmettik, mádeni damýynyń zańnamalyq tiregi bolyp keledi. Biz qabyldaǵan árbir qujat, eń aldymen, elimizdiń ekonomikasyn arttyrýǵa, halyqtyń áleýmettik jaǵdaiyn, sonyń ishinde ónerkásip, densaýlyq, bilim salalaryn jaqsartýǵa arnalyp keledi», - dedi N. Nyǵmatýlin palatanyń jalpy otyrysynda.
Sonymen birge ol biyl shaǵyn jáne orta biznes, ekologiia máselelerine de erekshe nazar aýdarylǵanyn atap ótti.
«Osynyń barlyǵy Tuńǵysh Prezident-Elbasy Nursultan Nazarbaevtyń strategiialyq tapsyrmalaryn jáne Memleket basshysy Qasym-Jomart Toqaevtyń bastamalaryn sapaly zańdarmen qamtamasyz etýge baǵyttalyp otyr. Aldymyzda áli de kóptegen mańyzdy mindetter tur. Biz kelesi jyly da qalyptasqan tájiribeni, múmkindikti paidalana otyryp, elimizdegi reformalardy jáne ózgeristerdi tiisti zańdarmen qamtamasyz etemiz dep senemiz», - dedi Májilis tóraǵasy.
Osy oraida ol depýtattarǵa, Májilis apparatynyń qyzmetkerlerine birlesken jumystary úshin alǵys aitty.
2022 jyly aýqymdy jumys kútip turǵanyna toqtalǵan N. Nyǵmatýlin, barsha fraktsiianyń, depýtatardyń birlesken jumysynyń arqasynda Májilis sapaly ári tiimdi zańnamalyq qoldaýdy qamtamasyz etetinine senimdi ekenin aitty.
