Búgin Májiliste Palata tóraǵasy Nurlan Nyǵmatýlin Qazaqstanǵa alǵash ret memlekettik saparmen kelgen Qyrǵyz Respýblikasynyń Prezidenti Sadyr Japarovpen kezdesti, dep habarlaidy "Ult aqparat".
Nurlan Nyǵmatýlin, eń aldymen, Sadyr Japarovty Qyrǵyz Respýblikasynyń Prezidenti bolýymen quttyqtap, Qyrǵyz eliniń damýy men órkendeýine baǵyttalǵan saiasi júieni reformalaýǵa qatysty alda turǵan mańyzdy mindetterin tabysty oryndaý úshin sáttilik tiledi.
Sonymen qatar, Májilis Tóraǵasy Qyrǵyz Prezidentiniń memlekettik sapary Qazaqstan men Qyrǵyzstan elderi Táýelsizdiginiń 30 jyldyǵynda ótip jatqanyna basa nazar aýdardy.
Nurlan Nyǵmatýlin basty maqsat - tarihi bailanysty saqtap, odan ári nyǵaitý ekenin jetkizdi.
Sondai-aq, barlyq baǵytta, sonyń ishinde parlamenttik yntymaqtastyq arqyly baýyrlas eki eldiń dostyǵyn odan ári tereńdetý úshin tiisti jumystardy jalǵastyratynyn atap ótti.
Kezdesýde qos memleket arasynda saiasi kelispeýshilikter joq ekenin jáne ekijaqty qarym-qatynastar júieli damyp kele jatqanyn alǵa tartqan Palata spikeri bunyń bári Elbasy Nursultan Ábishuly Nazarbaevtyń eńbegi ekenin jáne Qazaqstan Respýblikasynyń Tuńǵysh Prezidenti árdaiym Qyrǵyzstanmen ózara is-qimyldyń erekshe mańyzyn atap kórsetetinine toqtaldy.
Sonymen birge, Memleket basshysy Qasym-Jomart Kemeluly Toqaev Qyrǵyzstanmen yntymaqtastyqqa úlken mán beretinin aitqan Májilis tóraǵasy Qazaqstan men Qyrǵyzstannyń qarym-qatynasy jańa deigeige kóteriletinine nazar aýdardy.
Kezdesý barysynda Nurlan Nyǵmatýlin mártebeli meimanǵa VII shaqyrylymdaǵy Parlament Májilisiniń qyzmetimen tanystyryp, parlamentaralyq yntymaqtastyqty nyǵaitý men keńeitýdiń mańyzy týraly aityp, qalyptasqan dástúrli áriptestik qarym-qatynasty jalǵastyratynyna toqtaldy.
Óz kezeginde mártebeli meiman bizdiń elimizdiń jańa Parlamenttik quramynyń jumysyna sáttilik tiledi.
Sondai-aq, Qazaqstannyń Tuńǵysh Prezidenti Nursultan Ábishuly Nazarbaevtyń eki el arasyndaǵy yntymaqtastyqty nyǵaitý jolyndaǵy tarihi rólin joǵary baǵalaitynyn jáne ózara týystyq jáne dostyq qundylyqtardy odan ári órkendetýge úles qosatynyn aitty.
