Búgin Májiliste Palata Tóraǵasy Nurlan Nyǵmatýlin Resei Memlekettik Dýmasy Halyqaralyq ister komiteti tóraǵasynyń orynbasary Anatolii Karpovpen kezdesti, dep habarlaidy "Ult aqparat" Májilistiń baspasóz qyzmetine silteme jasap.
Kezdesý barysynda taraptar Qazaqstan men Resei arasyndaǵy túrli saladaǵy ózekti máselelerdi talqylady.
Májilis Tóraǵasynyń pikirinshe, Resei - bizdiń elimizdiń mańyzdy strategiialyq áriptesi jáne basty odaqtasy. Onyń aitýynsha, Qazaqstannyń Tuńǵysh Prezidenti Nursultan Nazarbaev pen Resei Federatsiiasynyń Prezidenti Vladimir Pýtinniń ózara túsinistik pen dostyqqa negizdelgen birlesken jumysynyń arqasynda kópqyrly yntymaqtastyqtyń joǵary nátijelerine qol jetkizildi. Sonymen qatar, Májilis Tóraǵasy Qazaqstan-Resei qarym-qatynastaryn nyǵaitýǵa baǵyttalǵan Elbasy kýrsynyń úzdiksizdigi qamtamasyz etiletinin atap ótti.
Nurlan Nyǵmatýlin men Anatolii Karpov ekijaqty yntymaqtastyqtyń mańyzdy quramdas bóligi retinde parlamentaralyq bailanystardy odan ári tereńdetýge senim bildirdi.
Óz kezeginde Anatolii Karpov Qazaqstanmen ony parlamenttik salamen qosa qoǵamdyq qyzmet te bailanystyratynyna toqtaldy. Atap aitqanda, shahmat salasynda. A.Karpov jetekshilik etetin Halyqaralyq beibitshilik pen kelisim qorlar qaýymdastyǵy bitimgershilik jobalaryna belsendi qatysady. Bul turǵyda Qazaqstannyń tájiribesi de zor qyzyǵýshylyq týdyryp otyr.
