QR Ortalyq sailaý komissiiasynyń tóraǵasy Nurlan Ábdirov taiaýda ótken sailaýdan keiin keibir aýyl ákimderiniń laýazymynan bas tartý sebebin atady, dep habarlaidy QazAqparat.
«Óńirlerdi aralaǵyndaǵy taǵy bir maqsatymyz boldy. Byltyr 25 shildede respýblikamyzda 736 ákim sailandy. Olar - aýyl ákimderi. Sapar barysyndaǵy maqsatymyz óz ákimderin ózderi sailaǵan aýyl turǵyndarymen kezdesý edi. Ózderi sailaǵan ákimge jurtshylyq riza ma? Kóńilderinen shyqty ma? Álde basqa oida ma? Ákimnen de surap otyrdyq. Osy jyldyń birinshi toqsanynda 71 ákim sailandy. Qazir ústi-ústi jeksenbi saiyn respýblikamyzdyń barlyq óńirinde aýyl ákimin sailaý ótip jatyr. Qazir orta eseppen alǵanda bir ákimniń ornyna keminde 2-3, tipti tórt adamnan talasyp jatyr, - dedi ol QR Prezidenti janyndaǵy Memlekettik basqarý akademiiasynda ótken «Jastar jáne referendým» aty oqytý seminary barysynda.
Onyń aitýynsha, ótken jyly shildede sailanǵan ákimderdiń arasynda 3, 6, 8 aidan keiin jumysyn tastap ketip jatqandar da bar.
«Halyq sailaǵan, biraq olar ketip jatyr. Kóp emes bolar, alaida 71-diń 10-y ketken. Qandai sebepter? Aýyryp qaldym, basqa óńirge kóshýge májbúr boldym, otbasylyq jaǵdaimen deidi. Ortalyqta otyryp surastyrsam, dál solai. Óńir aralyǵynda turǵyndarmen, oblystyq sailaý komissiialarynyń tóraǵalarymen sóilesip, mynany túidim. Shyn mánindegi sebebi ózi sailaǵan halyq sailap alǵan ákimine razy emes. Kóńilinen shyqpady. Jumysty ilip ákete almady. Ekinshiden, ákim bolǵan adamnyń qyzmeti oilaǵanyndai bolmady. Ákim táýlik boiy jumys isteitin adam», - dedi Nurlan Ábdirov.
