Ádildik joly respýblikalyq qoǵamdyq birlestiginiń tóraǵasy Didar Smaǵulov Qaraǵandy oblysy Nura aýdanyndaǵy máselege Antikordyń nazar aýdarýy kerektigin jariia etti. Aýdanda 105 mln teńgege salynýy tiis hokkei kortynyń siqy syn kótermei tur, dep habarlaidy Ulysmedia.kz.
«2022 jyldyń 5 qańtarynda Qaraǵandy oblysynyń Nura aýdanynda jergilikti daryndy balalardy qoldaý úshin hokkei korty ashylýy kerek edi. Ol úshin 105 000 000 teńge bólý josparlanyp, onyń 87 000 000 teńgesi 2021 jyly tólenip qoiǵan. 2022 jyldyń 25 sáýirinde biz atalmysh oryndy baryp kórip, jaǵamyzdy ustadyq – fotoda eshteńe salynbaǵany kórinip tur», - dep jazady Didar Smaǵulov.
Onyń habarlaýynsha, zańnyń buzylǵanyna qaramastan ákimdik nysandy salýǵa mindettelgen kompaniiany sotqa bermek túgili qosymsha kelisim baryn alǵa tartyp (onda aiaqtalatyn merzimi kórsetilmegen) ony qorǵashtap otyr eken.
«Dál sol kúni biz Antikorǵa tiisti ótinimdi joldadyq. Qylmystyq istiń qozǵalýyn kútip otyrmyz. Basqasha bolmaidy. Biz jemqorlyq degen qabyrǵa qulap túskeshe ura beremiz», - deidi ol.
