Búgin elorda ákimi Altai Kólginov saltanatty jaǵdaida pedagogtardy kásibi merekemen quttyqtady, dep habarlaidy "Ult aqparat".
Qala ákimdiginen málim etkendei, alǵash ret qala basshysy atynan «Nur-Sultan qalasynyń qurmetti pedagogy» medaliniń iegerlerine qosymsha 833 myń teńgeden berildi. Barlyǵy pedagogtarǵa 40 mln teńgeden astam qarajat tabys etildi. Sonymen birge birqatar oqý ornyna 9 mln teńgeden ákim granty usynylǵan.
«Elbasy Nursultan Ábishuly Nazarbaevtyń «Bilimdi urpaq« ideiasyna sáikes memleket sapaly bilimge erekshe kóńil bóledi. Elordada jyl saiyn oqý oryndaryn salyp jatyrmyz. Biyl salynǵan mektepter sany ótken jylmen salystyrǵanda eki esege artyq. Osy jyly 12 mektep salyndy. Kelesi jyly taǵy sonsha mektep salynady. Oqý oryndaryn zamanaýi jabdyqtarmen jabdyqtap, innovatsiialyq tehnologiialardy engizemiz.
Memleket basshysy «Pedagog mártebesi týraly« zańǵa qol qoidy. Osy jyldyń 1 qańtarynan bastap pedagogtardyń jalaqysy 25%, odan ári 2024 jylǵa deiin taǵy 25% ósedi. Ótken jyly biz turǵyn úi satyp alý úshin áleýmettik járdemaqy túrinde 1 mln teńge kólemindegi 275 sertifikatty óteýsiz negizde bóldik. Biyl da ustazdarymyzǵa turǵyn úi jaǵdaiyn jaqsartýǵa kómektesemiz. Qazaqstandyq ipotekalyq kompaniiamen birlesip 1 myń áleýmettik páter beremiz. Bul páterler muǵalimderge, áleýmettik qyzmetkerlerge, politsiia qyzmetkerlerine, dárigerlerge, órt sóndirýshilerge, mádeniet jáne sport qairatkerlerine beriledi. Túlekterge de qoldaý kórsetiledi. Mamandyqty tegin oqýǵa 900-ge jýyq grant bólindi. Qabyldanyp jatqan sharalar jumys úshin neǵurlym qolaily jaǵdai jasaýǵa jáne balalardyń sapaly bilim alyp, básekege qabiletti bolýyna baǵyttalǵan. Sizdiń qajyrly eńbegińiz úshin alǵys aitamyn!»,- dedi elorda ákimi Altai Kólginov.
Elordalyq pedagogtarǵa «Halyq alǵysy», «Eńbek ardageri» medaldary, «Qazaqstan Respýblikasynyń Bilim berý isiniń qurmetti qyzmetkeri» jáne Bilim jáne ǵylym ministrliginiń «Y. Altynsarin» tós belgileri, gramotalar jáne taǵy basqa da marapattar tabys etildi.
