Nur-Sultan qalasynyń ákimi Altai Kólginov elordadaǵy LRT qurylysyna qatysty pikir bildirdi. Ol jobaǵa taǵy bir milliard dollar qajet ekenin aitty, - dep habarlaidy Tengrinews.kz tilshisi.
"LRT - óte kúrdeli, tarihy bar, qarajatty qajet etetin joba. Biraq bastaǵan jumysymyzdy aiaqtaýymyz kerek. 2016 jyly konsortsiýmmen jáne banktermen kelisimge qol qoiyldy. Kelisimge qol qoiyldy, biraq problemalarǵa bailanysty keibir bankterde joba ýaqytsha toqtatyldy, bankter arqyly investitsiia tartý jáne bul jobany aiaqtaý jumystary júrgizilip jatyr.
Tolyq aqparat beremin. Jalpy somasy 1,8 milliard dollar turatyn joba, onyń 347 milliony qazirdiń ózinde júzege asyryldy. Bastapqyda Qytai Damý bankinen 4,9 paiyzdyq nesie berildi. Sodan aqshany únemdeý týraly sheshim qabyldadyq, EDB-den 3,25 obligatsiialyq nesie aldyq. Biz 800 million dollardy únemdep ustaýǵa, sondai-aq stantsiialar men jyljymaly quramdy qysqartý arqyly 150 million dollar únemdedik", - dedi Kólginov Ortalyq kommýnikatsiialar qyzmeti brifinginde.
Onyń aitýynsha, joba aiaqtalady.
"Endi bul jobany aiaqtaý úshin áli de bir milliard dollarǵa jýyq qarajat qajet. Kórip otyrsyzdar, bul qalamyzdyń kelbetin árlendirip turǵan joq. Turǵyndar sanynyń artqanyn eskere otyryp, bolashaqta qoǵamdyq ekologiialyq taza kólikti damytýǵa qanshama qarjy jumsalyp qoidy", - dep túsindirdi ákim.
