Qazir Nur-Sultan joldary ashyq. Qalada jaǵdai jaqsardy. Alaida boran saldarynan birneshe turǵyn zardap shegip, 160 jol apaty boldy. Elorda ákimdigi men Tótenshe jaǵdailar departamenti qolaisyz aýa raiynyń saldary týraly aitty, - dep habarlaidy Tengrinews.kz.
Tótenshe jaǵdailar departamenti málimetinshe, 112 qutqarý qyzmetine 2 175 shaqyrtý túsken. 29 naýryz saǵat 18.20-dan 30 naýryz tańǵy saǵat 6.00-ge deiin ekpindi jel men qarly boran saldarynan 18 oqiǵa týraly habarlama túsken. Turǵyndar aǵashtardyń qulaýy, shamdardyń synýy, shatyr jabyndarynyń buzylýy jáne t.b. derekterge qatysty shaǵymdanǵan.
Qalalyq qoǵamdyq densaýlyq saqtaý departamenti 29 naýryzda keshke aýa raiynyń nasharlaýyna bailanysty qalalyq aýrýhanalardyń travmatologiia jáne jedel járdem bólimshelerine túrli dene jaraqatymen 10 adam júgingenin habarlady. Jeti adam ózi kelse, úsheýi jedel járdemmen jetkizilgen. Bári ambýlatorlyq em alýǵa úiine jiberilgen.
Politsiia departamenti málimetinshe, elordada bir táýlikte 160 jol-kólik oqiǵasytirkelgen. Zardap shekkender joq.
"Keshe saǵat 20.10 shamasynda Lada kóligin tizgindegen 26 jastaǵy júrgizýshi Qarqaraly tasjolymen Qosshydan Qabanbai batyr dańǵylyna qarai kele jatyp, Volkswagen kóligimen soqtyǵysqan. Keptelis jáne boranda joldyń kórinbeýine bailanysty taǵy tórt kólik jol bóliginde soqtyǵysty", - dedi PD ókilderi.
Sondai-aq, keshe Astrahan tasjolymen Talapker aýyly jaǵynan kele jatqan Shacman júk kóliginiń júrgizýshisi róldi basqara almai, sol baǵytta kele jatqan basqa Shacman júk kóligimen soqtyǵysqan. Odan keiin taǵy úsh kólik soqtyǵysqan.
"Elordalyq qutqarýshylar kúsheitilgen rejimde jumys istep, 38 ret reis jasady. Qalada jáne jaqyn mańdaǵy aýdandarda qutqarý jumystaryn júrgizý kezinde 160 adam qutqaryldy, onyń ishinde 52-si bala.
Jol politsiiasymen birlese otyryp, beketter ornatyldy. Aialdamalarda avtobýs kútip turǵan azamattardy jetkizý úshin qala boiynsha 25 jergilikti aýysym jumys istedi", - dedi TJD ókilderi.
Qazir elordanyń aýdan ákimdikterinde boran saldaryn joiý boiynsha Jedel shtab kúsheitilgen rejimde jumysyn jalǵastyryp jatyr. Barlyq qyzmet táýlik boiy jumys isteidi, brigadalar kezekshilikte baǵdarshamdardy, shamdardy, qorshaýlardy jóndep jatyr.
Qala ákimdiginiń baspasóz qyzmeti boran saldaryn joiý týraly ótinishpen kelesi nómirler arqyly habarlaýǵa bolatynyn qosty:
- Saryarqa aýdany - 8 705 429 88 25, 55 64 91;
- Almaty aýdany - 8 708 813 3581, 36-10-90, 8 707 170 11 81 (WhatsApp);
- Baiqońyr aýdany - 8 775 938 06 91, 55 75 19;
- Esil aýdany - 8 775 643 40 63, 8 701 444 48 65, 8 775 110 01 96, 55 73 82, 55 69 07.
