Nur-Sultanda Ústel tennisi ortalyǵy men jyl on eki ai jumys isteitin Muz aidyny salynady, dep habarlaidy "Ult aqparat".
Elorda ákimi Altai Kólginov Instagram-paraqshasynda málim etkendei, óńirlik investitsiialyq keńeste jeke investorlardyń qarjysyna salynatyn birqatar joba qoldaý tapty.
«Óńirlik investitsiialyq keńeste jeke investorlardyń esebinen salynatyn birqatar joba qoldaý tapty. Máselen, Ústel tennisi sport ortalyǵynyń qurylysy. Budan bólek, hokkei men mánerlep syrǵanaýǵa arnalǵan jabyq muz aidyny salynady. Bul tek buqaralyq sport túrine jaǵdai jasap qana qoimai, sonymen qatar qysqy sport túrleri boiynsha federatsiialarymyzdy tehnikalyq bazamen qoldaýǵa múmkindik beredi. Sport federatsiialarymen kezdesý barysynda sportshylar nysandar boiynsha, sonyń ishinde muzda sportpen ainalysý úshin saǵattardyń jetispeýshiligi máselelerin kótergen bolatyn.
At sporty kesheninde ippoterapiia sabaqtary josparlanǵan. Bul, balalardyń sal aýrýy diagnozy bar adamdardy qajetti sabaqtarmen qamtýǵa múmkindik beredi.
Jumys istep turǵan ippodrom bazasynda erekshe qajettiligi bar balalardy ońaltýǵa arnalǵan at sporty kesheniniń qurylysyn júrgizip jatyrmyz. Keshen jabyq manejden, minbeden, alańdardan turady. Ippodrom bazasyn 3 baǵyt boiynsha damytamyz: ippoterapiia, ulttyq jáne klassikalyq sport túrlerin ótkizý jáne daiyndaý. Sonymen birge týristik marshrýttar-atpen serýendeý damytylady», - deidi A.Kólginov.
Qala basshysynyń aitýynsha, Prezidenttiń tapsyrmasyna sáikes buqaralyq sport túrin nasihattaý úshin birqatar sport nysany ashylady.
«Kásibi sport federatsiialaryn qoldaimyz, aýlalar men qoǵamdyq keńistikterdi (saiabaqtar, skverler, býlvarlar) salyp, abattandyramyz.
Investitsiialyq keńeste unnan jasalǵan konditerlik ónimder shyǵaratyn zaýyttyń, bilim berý nysandarynyń jáne t.b. qurylysyn qoldadyq. Pandemiia kezinde jeke investitsiialardy tartý qarqyny tómendegen joq, kerisinshe artty. Qoldaý tapqan jobalar baqylaýda, árbir investormen jeke jumys isteimiz», - dep jazdy Altai Kólginov.
