Búgin elordada Táýelsizdiktiń 30 jyldyǵy qarsańynda áskeri-tarihi mýzei janyndaǵy alańda memleket qairatkeri Jumabek Táshenovke qoiylǵan eskertkish ashyldy, dep habarlaidy "Ult aqparat" Nur-Sultan ákimdiginiń resmi saityna silteme jasap.
«Búgin kórnekti memleket qairatkeri, elimizdiń gúldenýine úlken úles qosqan Jumabek Táshenovke eskertkish ashyp otyrmyz. Osyǵan deiin Nur-Sultanda uly tulǵamyzǵa kóshe aty berilgen bolsa, jýyrda mektepke esimi qoiyldy. Endi mine kezek eskertkishke kelip otyr. Aǵamyzdyń músini komissiia músheleriniń, ziialy qaýym ókilderiniń, urpaqtarynyń kelisimimen quiyldy. Dál sondai-aq eskertkishtiń turǵan orny da múddeli taraptardyń kelisimimen tańdaldy. Búgingi elorda otanymyzdyń tek saiasi ǵana emes mádeni jáne rýhani ordasy. Búginge deiin Nur-Sultanda elimizdiń tanymal tulǵalaryna arnalǵan birqatar eskertkish ashyldy. Táýelsizdigimizdiń 30 jyldyǵy qarsańynda pandemiiaǵa qaramastan elimizdiń rýhaniiatyn kóteretin bastamalar ary qarai da jalǵasa beredi», - dedi Nur-Sultan qalasy ákiminiń orynbasary Ashat Oralov.
Óz kezeginde, sóz alǵan memleket qairatkeri, ǵalym Myrzatai Joldasbekov elimizdiń órkendeýi jolynda eńbek etken asyl azamattarymyz az bolmaǵanyn, solardyń arasynda Jumabek Táshenovtiń shoqtyǵy biik ekenin airyqsha atap ótti. Sol siiaqty halqymyzdyń arda tulǵasyna arnalǵan eskertkish qalamyzdyń kórikti oryndarynyń birinen ashylyp otyrǵanyn aita kele el rýhaniiatynyń damýy jolynda eńbek etip jatqan qala ákimdigine alǵysyn bildirdi.
«Búgingi memlekettik tulǵaǵa ashylyp otyrǵan eskertkish Táýelsizdiktiń jarqyn jemisi. Tarihi tulǵamyzdyń músini elordamyzdyń tórine ornatylyp otyr. Qýanyshymyz qutty bolsyn! Jumabek Táshenov óz eliniń perzenti retinde el aldyndaǵy paryzyn ótegen tulǵa dep esepteimiz», — dedi memleket jáne qoǵam qairatkeri Oralbai Ábdikárimov.
Al urpaqtarynan uly Saian Jumabekuly men kelini Fatima Sadyqqyzy sóz sóilep, Elbasyna, Memleket basshysyna alǵysyn bildirdi.
«Jurt menen ákeńniń atyn nelikten nasihattamaisyń, elge sińirgen eńbegin ne úshin aitpaisyń dep surap jatady. Al meniń oiymsha elge syily azamattyń eńbegin halqy ózi baǵalaýy tiis. Búgingi ashylyp otyrǵan eskertkish halyqtyń ákeme degen syi-qurmeti dep bilemin», - dedi Saian Jumabekuly.
Jumabek Táshenov eskertkishiniń sáýletshisi – Q.Qorǵanov, músinshi – E.Erjanov. Músin qoladan, tuǵyry granitten quiyldy, eskertkishtiń jalpy biiktigi 8,2 metr.
Búginde Nur-Sultanda qala turǵyndary úshin tartymdy oryndarǵa ainalatyn jańa qoǵamdyq keńistikti jailastyrý jumysy belsendi júrgizilýde. Táýelsizdiktiń 30 jyldyǵyna orai biyl elordada mádeniet pen jalpy eldiń damýyna úlken úles qosqan belgili qazaq qairatkerlerine arnalǵan eskertkish toptamasy ashyldy. Buǵan deiin qalada alashordashylarǵa, Dina Nurpeiisova, Talǵat Bigeldinov, Qanysh Sátbaev syndy tulǵalarǵa eskertkishter qoiylǵan bolatyn. Sondai-aq, Nur-Sultanda kún saiyn adam ómirin qutqaratyn órt sóndirýshiler men meditsina qyzmetkerleriniń qurmetine monýmentter ornatyldy. Bul jumys jastarǵa rýhani, patriottyq jáne mádeni qundylyqtardy nasihattaý maqsatynda júrgiziledi.
Aita ketý kerek, qalyptasqan epidemiologiialyq jaǵdaiǵa bailanysty eskertkishtiń ashylýy maska rejimi, áleýmettik qashyqty saqtaý sekildi sanitarlyq talaptardy saqtai otyryp ótti.
