Elordada TMD-ǵa múshe memleketter bas prokýrorlarynyń úilestirý keńesiniń jiyny ótýde, dep habarlaidy QazAqparat.
«QR Bas prokýrory Ǵizat Nurdáýletovke búgingi is-sharany uiymdastyryp, qazaq jerinde jyly shyraimen qarsy alǵany úshin jáne keńestiń barlyq músheleriniń jeke kezdesýine múmkindik bergeni úshin erekshe rizashylyǵymdy bildirgim keledi. Pandemiianyń shielenisken jaǵdaiynda kópten kútken bul kezdesý QR Bas prokýratýrasy men Úilestirý keńesi hatshylyǵynyń ujymdarynyń úilesimdi jumysynyń arqasynda múmkin boldy. Bul bizdiń yntymaqtastyqty odan ári damytýǵa jáne ózekti máselelerdi birlesip sheshýge baǵyttalǵanymyzdyń dáleli», - dedi Resei Federatsiiasynyń Bas prokýrory Igor Krasnov otyrysty asha otyryp.
Óz kezeginde QR Bas prokýrory Ǵizat Nurdáýletov osy baǵyttaǵy birlesken jumystyń mańyzdylyǵyn atap ótti.
«Elderimizdegi koronavirýs jaǵdaiynyń turaqtanýy is-sharany dástúrli formatta ótkizýge múmkindik berip otyr. Men barshańyzdy esen-saý kórgenime qýanyshtymyn. Otyrys jumysyna Táýelsiz Memleketter Dostastyǵyna qatysýshy memleketterdiń bas prokýratýralarynyń delegatsiialary qatysýda», - dep atap ótti QR Bas Prokýrory.
Sondai-aq, ol biyl TMD-ǵa múshe memleketterdiń kóbi el táýelsizdiginiń 30 jyldyǵyn toilap jatqanyn eske saldy.
«Biyl aramyzda kóptegen elder Táýelsizdiktiń 30 jyldyǵyn atap ótip jatyr. Osy jyldar ishinde biz zańdylyqty nyǵaitý jáne qylmysqa qarsy kúres isinde mańyzdy baǵyttar boiynsha bailanysymyzdy ydyratpai, jemisti yntymaqtastyq ornattyq», - dep túiindedi Ǵizat Nurdáýletov.
