Foto: Tengrinews.kz/Turar Qazanǵapov
Nur-Sultanda koronavirýs boiynsha epidemiologiialyq jaǵdai shielenisip tur. Elordanyń bas memlekettik sanitariia dárigeri Sarhat Beisenovanyń aitýynsha, qalada aýrýshańdyq 9,5 esege artqan, - dep habarlaidy Tengrinews.kz.
"Elordada SARS-Cov-2 virýsynyń tez taraýyna bailanysty epidemiologiialyq jaǵdai shielenisip tur. Eger 22 maýsym men 5 shilde aralyǵynda (eki aptada) 414 jaǵdai tirkelgen bolsa, sońǵy eki aptada (6 shilde men 19 shilde aralyǵynda) KVI-diń 3970 jaǵdaiy tirkeldi, osylaisha syrqattanýshylyq deńgeii 9,5 esege artty. Jańa jaǵdailar táýligine 586-ǵa jetti", - dedi Beisenova elorda ákimdiginde ótken brifingte.
Sanitariia dárigeri epidemiologiialyq jaǵdaidy baǵalaý matritsasy boiynsha qala "sary" aimaqqa jaqyndap kele jatqanyn aitty.
Sarhat Beisenovanyń aitýynsha, maýsymda koronavirýs juqtyrǵan naýqastardyń 30 úlgisine molekýliarlyq-genetikalyq zertteý júrgizilgen. "Stels-omikron" basym genetikalyq jeli bolyp tur.
"Biz biletindei, kishi túrleri bar "omikron" shtamy joǵary juqpaly virýs retinde sipattalady, barlyq jastaǵy adam infektsiia juqtyrýǵa beiim. Alaida 20-dan 30 jasqa deiingi adamdar kóbirek juqtyrady. Klinikalyq belgileri: sharshaý, bas aýrýy jáne dene temperatýrasynyń kóterilýi. Ókinishke qarai, vaktsina alǵan adamdarda, sondai-aq aýryp jazylǵan adamdarda ýaqyt óte kele deneni infektsiiadan qorǵaý deńgeii tómendeidi, nátijesinde ol qaitadan infektsiiaǵa sezimtal bolady. Osyǵan bailanysty koronavirýsqa qarsy revaktsinatsiia jáne vaktsinatsiianyń bastapqy kýrsyn alǵannan keiin alty aidan soń qaita ekpe alý usynylady. Sondai-aq, eger PTR-synamasy oń bolsa nemese naýqaspen tyǵyz qarym-qatynasta bolsańyz, onda vedomstvoaralyq komissiianyń sheshimi boiynsha qashyqtan jumys isteýge kóshý kerek ekenin eske salamyn", - dep tolyqtyrdy Sarhat Beisenova.
