Quqyq qorǵaý organdary qala aýmaǵynda koronavirýs juqpasynyń taralýyna jol bermeý, azamattardyń ómiri men densaýlyǵynyń qaýipsizdigin qamtamasyz etý úshin barlyq qajetti sharalardy qabyldaýda, dep habarlaidy elorda ákimdiginiń resmi saity.
«14 sáýir kúni qalalyq politsiia departamentiniń aýmaqtyq bólimshelerine 169 adam jetkizildi. Sonyń ishinde, 142 azamat ákimshilik jaýapkershilikke tartylyp, 9-y qamaýǵa alyndy. Sondai-aq, 97 aiyppul salynyp, 32 eskertý jasaldy. Munan bólek 4 is sottyń qaraýynda», – delingen Nur-Sultan qalalyq politsiia departamentiniń baspasóz qyzmetiniń habarlamasynda.
Sonymen qatar, túrli ákimshilik quqyq buzýshylyq úshin 98 avtokólik kommýnaldyq turaqtarǵa qamalǵan. «Bizdiń maqsatymyz – qoǵamdyq tártipti, karantin rejimin saqtaý, turǵyndar arasynda túsindirme júrgizý. Ókinishke orai, munyń mańyzyn túsinbei, rejimdi buzatyndar kóp. Keibir adamdar agressivti kóńil-kúide qabyldaidy. Biraq biz olardyń igilikteri úshin ne isteý kerektigin túsindirýge tyrysamyz. Eń agressivti degen turǵyndardyjaýapkershilikke tartamyz, áitpese bolmaidy», – deidi Saryarqa aýdandyq politsiia basqarmasynyń jergilikti politsiia qyzmeti bóliminiń bastyǵy Marat Ómirbaev.
Buryn habarlaǵandai, elordada politsiia qyzmetkerleri táýlik boiy kezekshilik júrgizip, qalanyń barlyq aýdandarynda azamattar men avtokólik quraldarynyń qozǵalysyn qatań baqylaýda ustaýda. Mobildi toptar, jaiaý nariadtar jumyldyrylǵan. Blokpostardaǵy jaǵdai dron kómegimen qadaǵalanýda. Qala aýmaǵy kóshe shekaralary boiynsha sharshylarǵa bólingen. Olardyń árqaisysynda tártip saqshylary jaǵdaidy qadaǵalaidy. Qalada 26 mobildi beket qoiylǵan.
Nur-Sultanda azyq-túlik, dári-dármek satyp alýdy, qajet bolǵan jaǵdaida meditsinalyq mekemelerge júginýdi, sondai-aq qyzmeti ruqsat etilgen jumysqa shyǵýdy qospaǵanda, azamattardyń úiden shyǵýy shektelgen. Kámeletke tolmaǵandarǵa qala boiynsha eresekterdiń erip júrýinsiz júrýge tyiym salynady. Otbasy múshelerin qospaǵanda, kóshelerde úsh adamnan artyq jinalýǵa ruqsat etilmeidi. Politsiia qyzmetkerleri turǵyndar arasynda engizilgen shekteýlerdi saqtaý týraly túsindirme júrgizýde. Tótenshe jaǵdai rejimin jáne shekteý sharalaryn qasaqana buzǵan jaǵdaida tártip buzýshylarǵa qatysty tiisti zańnamaǵa sáikes sharalar qoldanylatyn bolady.
