Keshe elordada bastalǵan Aziia qalamgerleriniń I forýmy aiasynda bas qalanyń Abai men Sembinov kósheleriniń qiylysynda «Qalamgerler alleiasy» ashyldy, dep habarlaidy egemen.kz.
Is-sharany júrgizgen Jazýshylar odaǵy Nur-Sultan qalalyq filialynyń direktory Dáýletkerei Kápuly:
– Saryarqanyń saiyn dalasyn dúbirletken kindik Aziianyń qarashańyraǵy – Qazaq eli kesheden beri Aziia elderi qalamgerleriniń forýmyn ótkizip jatyr. Búgingi is-shara qazaq rýhaniiatyna, aqyn-jazýshylarǵa joǵary deńgeide kóńil bólinip jatqanynyń aiǵaǵy», – dei kele, sóz kezegin qala ákiminiń orynbasary Baqtiiar Mákenge berdi.
Nur-Sultan qalasy ákiminiń orynbasary Baqtiiar Máken jinalǵan qonaqtardy – qazaqtyń marǵasqa qalamgerlerin qala basshysy atynan merekelerimen shyn júrekten quttyqtap, shyǵarmashylyq tabys tiledi.
Sondai-aq óz kezeginde sóz alǵan Oljas Súleimenov pen Ulyqbek Esdáýlet te áriptesterin aitýly is-sharamen quttyqtap, izgi tilegin jetkizdi.
Nur-Sultan qalasy Tilderdi damytý jáne muraǵat isi basqarmasynyń basshysy Tileýǵali Qyshqashbaevtyń aitýyna qaraǵanda, elordanyń Saryarqa aýdanynda ornalasqan alleiaǵa «Qalamgerler alleiasy» degen ataý berýdi usynǵan.
Eske sala ketsek, «Qalamgerler alleiasy» Aziia qurlyǵynda ornalasqan elder arasyndaǵy ádebi-mádeni bailanystardy nyǵaitý, odan ári damytý hám egemendi elimizdiń búgingi keskin-kelbetin, Qazaqstannyń ádebietin, rýhani qundylyqtaryn dáripteý, ádebi úderistiń damýyna qatysty Aziia elderimen tájiribe almasý maqsatynda Qazaqstan Jazýshylar odaǵy, Prezident Ákimshiliginiń jáne Mádeniet jáne sport ministrliginiń qoldaýymen ótip jatqan Aziia elderi qalamgerleriniń I forýmy aiasynda Nur-Sultan qalasynda ashyldy.
Qazirgi tańda alleiaǵa arnaiy eskertkish taqta ornatyldy. Eskertkish taqta bilimdi, danalyqty, shyǵarmashylyqty bildiretin ashyq turǵan kitap beinesinde berilgen. Eskertkish taqta biiktigi – 150 sm, eni – 165 sm.
