Nur-Sultanda Covid-19 boiynsha jedel járdem shaqyrý sany táýligine 500-den 6-ǵa deiin (83,3 ese tómendedi) azaidy, dep habarlaidy "Ult aqparat".
Elorda ákimdiginiń Instagram paraqshasyndaǵy málimetke sáikes, shaqyrýlardyń jalpy sany 3 ese – táýligine 3 myńnan 1 myńǵa deiin tómendedi. Statsionarlarda ókpe qabynýymen aýyratyn naýqastardyń sany 7 ese azaidy. Qabyldanǵan karantin sharalarynyń arqasynda infektsiianyń taralý tizbegin úzip, meditsina uiymdary men qyzmetkerler júktemesin edáýir azaitýǵa qol jetkizildi.
«Qazirgi ýaqytta statsionarlarda 343 adam bar. Aýrýdyń sharyqtaý sheginde 4 myńǵa jýyq adam boldy. Alty aptaǵa sozylǵan karantinniń arqasynda koronavirýstyń taralýyna bailanysty jaǵdai retteldi. Memleket qabyldaǵan sharalar dárigerlerge óz jumystarymen tikelei ainalysýǵa – adam ómirin saqtaýǵa múmkindik berdi. Meditsina qyzmetkerleri árbir naýqasqa tiisti kóńil bóldi. Biz tómendeý dinamikasyn jalǵastyryp qana qoimai, karantin nátijelerin de bekitýimiz kerek. Infektsiia taralmaýy úshin bárin jasaý qajet. Muny boldyrmaý tek qatań sanitarlyq-epidemiologiialyq normalardy saqtaý arqyly ǵana múmkin. Karantindi jeńildetý virýs túbegeili joiyldy degendi bildirmeidi. Onyń qaýpi áli de bar. Týystaryńyzdy qorǵaý úshin qatań sanitarlyq normalaryn ustanyp, qonaqqa, adam kóp jinalatyn oryndarǵa barýdan bas tartý qajet», - dedi elorda ákimi Altai Kólginov.
Elordada 16 statsionardyń altaýy jabyldy. Olardaǵy barlyq naýqastar emdelip shyqty. Statsionarlardyń júktemesi 99 paiyzdan 17,2 paiyzǵa deiin tómendedi. Barlyq qalalyq emhanalar aldyn ala jazylý boiynsha josparly qabyldaýdy qaita bastady. KVI belgileri barlardy qabyldaý boiynsha filtr-kabinetterdiń jumysy jalǵasýda.
Ákimdik meditsina mekemelerine 600-den astam flýometr, 500 ottegi kontsentratory, 500 arnaiy kerýet, ókpeni jasandy jeldetý jáne kompiýterlik tomografiia apparattaryn jetkizdi. Meditsina jabdyqtary men dári-dármek satyp alý boiynsha jumystar turaqty negizde júrgizilýde.
