Elordada Memleket basshysynyń tapsyrmasyn oryndaý aiasynda uiymdastyrylǵan QR Básekelestikti qorǵaý jáne damytý agenttigi janyndaǵy birja komitetiniń Ahýaldyq ortalyǵy óz jumysyn bastady, dep habarlaidy primeminister.kz.
Ahýaldyq ortalyq birjalyq saýda-sattyq barysyn onlain rejimde qadaǵalaý, birjalyq jáne birjadan tys baǵa belgilenimderine monitoring júrgizý jáne birjalyq saýdaǵa monopoliiaǵa qarsy talaptardy saqtaý úshin quryldy. Ahýaldyq ortalyqtyń ashylýyna QR Premer-Ministriniń orynbasary Roman Skliar qatysty.
Ol birqatar taýarlardyń saýda-sattyǵyn iske qosý boiynsha birjalyq komitettiń atqarǵan jumysynyń tiimdiligin atap ótip, qysqa merzimde saýda tetikterin odan ári jetildirý, naryqqa qatysýshylardy tartý jáne oqytý máselelerin sheshý mindetin qoidy.
Ahýaldyq ortalyqtyń ashylýyna saýda jáne integratsiia ministri Baqyt Sultanov, energetika vitse-ministri Áset Maǵaýov, otandyq jáne halyqaralyq taýar birjalarynyń ókilderi qatysty.
Tusaýkeser barysynda Qazaqstannyń iri taýar birjalarynyń basshylary janarmai, bitým, kommýnaldyq-turmystyq kómirdiń shaǵyn partiialary saýdasynyń nátijelerin usyndy, olardy satý birjalyq platformalar arqyly alǵash ret 2021 jyly bastaldy.
Osylaisha, kommýnaldyq-turmystyq kómirdi taýar birjalary arqyly satý tetigi deldaldardyń sanyn qysqartýǵa múmkindik berdi jáne óńirlik operatorlardyń kómirdi razrezderdiń ózinen satyp alýǵa tikelei qol jetkizýin qamtamasyz etti, bul halyq úshin otynnyń osy túriniń túpkilikti qunyn tómendetýge múmkindik beredi.
Alǵashqy saýda-sattyq nátijeleri boiynsha taýar birjalary arqyly 51 mln teńgeden astam somaǵa «Qarajyra» AQ óndirgen 9 100 tonna (80%) kómir satyldy, oǵan 8 óńirlik tuiyqtardyń satyp alýshylary qatysty.
«Shubarkól Kómir» AQ kenishinen 703 mln teńgeden astam somaǵa 89 080 tonna (60%) satyldy, saýdaǵa 15 óńirlik tuiyqtardyń satyp alýshylary qatysy.
