Nur-Sultanda áskeri mindettilerdi arnaýly jiynǵa shaqyrý jalǵasýda. Áskeri mindettiler blokpostta qyzmet etip, kóshelerdi kúzetedi, dep habarlaidy "Ult aqparat" elorda ákimdiginiń resmi saityna silteme jasap.
«Eriktilerdiń taǵy bir legi mindetti meditsinalyq tekserýden ótti. Áskeri qyzmetke jaramdy adamdar tótenshe jaǵdai rejimin qamtamasyz etý aiasynda blokpostta qyzmet etedi, eldi-mekender men infektsiia oshaqtary bar qala nysandaryn kúzetedi», - dedi Nur-Sultan qalasy qorǵanys isteri jónindegi departament basshysy Aqjoltai Ýáliahmetov.
«Men áskeri esepke alý jáne shaqyrý bólimine óz erkimmen keldim. Meditsinalyq tekseristen ótip, qyzmetke jaramdylar qataryna qosylamyn dep oilaimyn. Árbir áskeri qyzmetker jaýapkershilik tanytyp, qiyn ýaqytta óz eline kómek kórsetýi kerek», - deidi zapastaǵy áskeri qyzmetker Ersaiyn Balǵabaev.
Aita keteiik, 3 sáýirde Memleket basshysy Qasym-Jomart Toqaev áskeri qyzmetshilerdi arnaýly jiynǵa shaqyrý týraly jarlyqqa qol qoidy.
Arnaýly jiyn ótkizilgen kezde áskeri qyzmetke shaqyrylýshylar tamaqpen, kiim-keshek jáne jalaqymen tolyq qamtamasyz etiledi. Áskeri mindettiler qaladaǵy oqý oryndarynyń jataqhanasyna ornalastyrylady.
Nur-Sultan qalasyndaǵy arnaýly áskeri daiyndyqqa barǵysy keletinder 32-70-80 telefon nómiri arqyly qalalyq qorǵanys isteri jónindegi bólimge qońyraý shala alady.
