Qazaqstannyń Eńbek Eri, halyq jazýshysy Ábish Kekilbaiuly týraly «Abyz Ábish» kitaby jaryq kórdi, – dep habarlaidy «Ult aqparat».
Ábish Kekilbaiuly týraly tolǵanystardy QR Parlamenti Májilisiniń depýtaty, filologiia ǵylymdarynyń doktory, professor Saýytbek Ábdirahmanov jazǵan. Onda qalamgerdiń álemdik aýqymdaǵy asqan oishyldyǵy, mádeniet, óner, saiasat, tarih, ádebiettegi sheberligi jan-jaqty kórsetilgen.
«Qai halyqta da maqtan tutatyn tulǵalar bolady. Ulttyń óz ishinde ardaq tutatyn adamdar az emes. Biraq halyqtyń ózge dúniege, álemge mańdai etip ustaityn tulǵalary kóp bolmaidy. Olar az bolady. Sol qazaq úshin azdyń bireýi – Ábish. Qazirdiń ózinde áýlie Ábish, ańyz Ábish dep atalyp otyrǵan, kózi tirisinde-aq ańyzǵa ainalǵan adam shyn máninde álemdik barlyq ólshemder boiynsha uly oishyldar qatarynda. Jasy otyzdan jańa asqan kezde-aq Eýropanyń baspalary HH ǵasyrdaǵy álemniń 100 tańdaýly jazýshysy qataryna qosqan tulǵa bolatyn. Ábish aǵanyń sheshendigi, kósemdigi, ádildigi, taýsylmaityn bilimi, erekshe jady bolashaq urpaqqa tańǵalarlyq fenomen, úirenetin úzdik úlgi bolyp qala beredi» dedi Saýytbek Abdrahmanov.
Kitaptyń alǵysózin Qazaqstan Respýblikasynyń Prezidenti Qasym-Jomart Toqaev jazǵan.
Aita keteiik, Ábish Kekilbaiulynyń 80 jyldyq mereitoiy keń aýqymda atalyp ótýde. Almatyda jazýshy atyna kóshe berilip, ózi turǵan úige memorialdyq taqta qoiyldy. Týǵan aýylyndaǵy mektepte mýzei ashylyp, jazýshynyń biýsti ornatyldy. Mańǵystaý oblystyq ólketaný mýzeiine Ábish Kekilbaiulynyń aty berildi.
Nur-Sultanda ótken «Ábish Kekilbaiuly jáne Uly dala rýhaniiaty» atty halyqaralyq ǵylymi-teoriialyq konferentsiiada jazýshy shyǵarmalaryn BUU tilderine aýdaryp, keńinen nasihattaý úshin Ulttyq aýdarma biýrosyna usynys jasaý, EUÝ-degi «Ábish Kekibaiuly dárishanasyn» tyń materialdarmen tolyqtyryp, qaita jabdyqtaý jáne Á. Kekilbaiulynyń qairatkerligine bailanysty qujattardy kóp tomdyq jinaq etip daiarlaý jóninde qarar qabyldandy.
