Elordanyń kommýnaldyq qyzmetteri kúsheitilgen rejimde táýlik boiy jumys isteýde. Qys bastalǵaly qaladan 1,3 mln tekshe metrden astam qar shyǵaryldy, bul shamamen 98 myń júk kóligine teń, dep habarlaidy QazAqparat qala ákimdiginiń resmi saityna silteme jasap.
Búgin, 29 jeltoqsanda elordada qar jinaý jumysyna myńnan astam arnaiy tehnika men eki myńǵa jýyq jol jumysshy jumyldyryldy.
Aita ketý kerek, 28 jeltoqsannan 29 jeltoqsanǵa qaraǵan túni qaladan 7 myń tekshe metrden astam qar shyǵaryldy, ol úshin júk kólikteri qar poligondaryna 572 reis jasady.
Qys mezgili bastalǵaly 1,3 mln tekshe metrden astam qar shyǵaryldy.
Qalanyń kommýnaldyq qyzmetteri keshki jáne túngi ýaqytta kúsheitilgen rejimde táýlik boiy jumys isteidi.
Ereje boiynsha, keptelis bolmaýy úshin aldymen qozǵalysy óte qarqyndy ýchaskeler tazartylady.
Sondai-aq ortasha qarqyndy ýchaskeler – alańdar, vokzal mańyndaǵy aýmaqtar, trotýarlar, áleýmettik nysandarǵa kiretin joldyń qary kúreledi.
