Elordada Nur-Sultan snowpark ashylady, dep habarlaidy "Ult aqparat".
Qalalyq ákimdiktiń málimetine qaraǵanda, 20 jeltoqsanda Atatúrik saiabaǵynda taý shańǵysy men snoýbordqa arnalǵan jasandy tóbeshik paida bolady.
Nysan Qazaqstanda alǵash ret qysqy qoǵamdyq keńistikti damytý aiasynda ornatylǵan.
Qurylystyń jalpy aýdany 720 m2-den asady. Uzyndyǵy - 40 m, eni - 18 m.
Elordalyq Ýrbanistika ortalyǵynyń basshysy Elnar Bazykenniń aitýynsha, saiabaq kóptegen plastik, metall jáne aǵash elementterden jasalǵan.
«Bul qyzyqty sport túri turǵyndar men elorda qonaqtarynyń qysqy demalysyn túrlendire túsetinine senimdimin» deidi ol.
Snoýpark aýmaǵynda jańadan bastaýshylarǵa qajetti jabdyqty jalǵa berýdi uiymdastyrý josparlanýda, nusqaýshylar áýesqoilarǵa sabaq beredi.
Keshke snoýpark shamdarmen jaryqtandyrylady. Osylaisha, ekstremaldy sport túrlerine áýesqoilar úshin kúndizgi ǵana emes, túngi shańǵy tebýdi de uiymdastyrý josparlanýda.
«Nur-Sultan - jaily qala» bas josparyna sáikes buqaralyq sportty keńinen nasihattaý úshin qoǵamdyq oryndar salynady. Qyzyqty jerler tek jazda ǵana emes, sonymen qatar qys mezgilinde de bolýy kerek. Bul mindetti ýrbanister aýdan ákimdikterimen birge júzege asyrady. Mundai oryndardy búkil qala boiynsha qurý josparlanyp otyr», - dedi Nur-Sultan qalalyq sáýlet, qala qurylysy jáne jer qatynastary basqarmasy basshysy Nurlan Ýranhaev.
Atatúrik atyndaǵy saiabaqta snoýbordshylar men shańǵyshylarǵa arnalǵan snoýparkpen bige muz aidyny, konkimen syrǵanaýǵa arnalǵan muz aidyny jáne animatorlary bar Aiaz ata úii salynady.
Jyly oryndar men kofehanalar da uiymdastyrylady.
