Nur-Sultan qalasy birinshi bolyp Islam áleminiń «jasyl» astanasy atandy, dep habarlaidy "Ult aqparat" SIM silteme jasap.
Qazaqstannyń Mysyrdaǵy Elshisi Arman Isaǵaliev bastaǵan delegatsiia Marokkonyń astanasy Rabat qalasynda ornalasqan Bilim, ǵylym jáne mádeniet jónindegi Islam uiymynyń (ISESKO) shtab-páterinde ótken Ekologiia ministrleriniń 8-shi islam konferentsiiasyna qatysty.
Marokko Koroli Muhammed VI qoldaýymen ótken bul forýmnyń basty taqyryby «Qorshaǵan ortany qorǵaý men turaqty damýdaǵy mádeni jáne dini faktorlardyń róli» boldy.
Konferentsiiaǵa 36 memleket pen 11 halyqaralyq uiymnyń delegatsiialary qatysty. Is-shara barysynda qatysýshylar musylman áleminiń qorshaǵan ortasy, dúniejúzilik jylý kóterilý úderisi, aýa men sý kózderiniń lastanýy problemalaryn talqylap, islam elderiniń ekologiiany saqtaý jolyndaǵy saiasatyn damytý joldaryn belgiledi. Talqylaý nátijesinde strategiialyq máni bar qujattar qabyldandy.
Sonymen qatar, forým aiasynda islam memleketteriniń qorshaǵan ortany qorǵaýǵa qosqan erekshe úlesi úshin arnaiy marapattar tapsyryldy.
ISESKO komissiiasy Nur-Sultan qalasy ákimdiginiń bul saladaǵy jumysyna joǵary baǵa berip, saiystyq negizde Qazaqstan astanasyna «Musylman áleminiń eń jasyl qalasy» nominatsiiasynda arnaiy syi berdi.
