Nur-Sultannan 16 qalaǵa, Almatydan 18 qalaǵa ishki áýe reisteri toqtatyldy, dep habarlaidy "Ult aqparat" Indýstriia jáne infraqurylymdyq damý ministrligine silteme jasap.
«QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń sheshimderin oryndaý úshin 2020 jylǵy 22 naýryz kúni saǵat 00:00-den bastap halyqaralyq jáne júk reisterin qospaǵanda, barlyq qazaqstandyq áýe kompaniialardyń Nur-Sultan jáne Almaty qalalaryna keletin jáne ushyp shyǵatyn turaqty, turaqty emes (charterlik) jolaýshylar reisteri toqtatylady», - delingen aqparatta.
Atap aitqanda Nur-Sultan qalasynan Almaty, Balqash, Taldyqorǵan, Petropavl, Taraz, Shymkent, Jezqazǵan, Qyzylorda, Oral, Óskemen, Pavlodar, Semei, Aqtaý, Atyraý, Aqtóbe, Qostanai jáne taǵy basqa qalalarǵa 16 ishki baǵyt boiynsha aptasyna 320 turaqty reis toqtaidy.
Al Almaty qalasynan Nur-Sultan, Balqash, Kókshetaý, Petropavl, Taraz, Shymkent, Jezqazǵan, Qaraǵandy, Qyzylorda, Oral, Óskemen, Pavlodar, Semei, Úrjar, Aqtaý, Atyraý, Aqtóbe, Qostanai jáne taǵy ózge qalalarǵa 18 baǵyt boiynsha aptasyna 295 turaqty reis toqtatylady.
«QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiia otyrysynyń 2020 jylǵy 16 naýryzdaǵy № 1 hattamasyna sáikes áýe kompaniialar tótenshe jaǵdai rejimi qoldanylatyn kezeńde áýe biletterin aiyppulsyz jáne tolyq kólemde qaitarýdy rásimdeýi qajet. Azamattyq aviatsiia komiteti azamattardyń shoǵyrlanýyn boldyrmaý úshin jolaýshylarǵa 2020 jylǵy 22 naýryzda saǵat 00:00-den bastap Nur-Sultan jáne Almaty qalalarynyń áýejailaryna barmaýdy usynady», - dedi vedomstvodan.
