Aqmola oblysy aýmaǵynda «Nur-Sultan-Kókshetaý» tasjolynda pirotehnikalyq otshashý tielgen júk kóligi otqa orandy, dep habarlaidy QazAqparat.
Oblystyq TJD baspasóz qyzmetiniń málimetinshe, tótenshe jaǵdai búgin saǵat 21:26 shamasynda «Nur-Sultan-Kókshetaý» tasjolynyń 212 shaqyrymynda oryn alǵan.
«Anyqtalǵandai, pirotehnikalyq otshashý tielgen «DAF» júk kóligi órtendi. Órtti sóndirýge TJD jeke quramynan 10 adam jáne 3 arnaiy tehnika jumyldyryldy. Órt shyǵý sebepteri men saldary anyqtalýda», - dedi vedomstvodan.
Aita keteiik, oqiǵa ornynda kýágerler qyzyl jalynǵa oranǵan kólikten aspanǵa atqylap jatqan otshashýdy beinejazbaǵa túsirip, áleýmettik jelide bólisýde.
Órtten júk kóliginiń tirkemesi tolyq janyp ketti.
Kýágerlerdiń sózinshe, zardap shekkender joq.
