© Sputnik / Vladislav Vodnev
Memleket basshysy Qasym-Jomart Toqaev Qazaqstan Respýblikasynyń elordasy - Nur-Sultan qalasynyń ataýyn Qazaqstan Respýblikasynyń elordasy - Astana qalasy dep ózgertý týraly Jarlyqqa qol qoidy, - dep habarlaidy "Ult aqparat" Aqordanyń baspasóz qyzmetine silteme jasap.
"Qazaqstan Respýblikasynyń əkimshilik-aýmaqtyq qurylysy týraly" 1993 jylǵy 8 jeltoqsandaǵy Qazaqstan Respýblikasy zańynyń 9-babyna sáikes QAÝLY ETEMIN:
1. Qazaqstan Respýblikasynyń elordasy - Nur-Sultan qalasynyń ataýy Qazaqstan Respýblikasynyń elordasy - Astana qalasy dep ózgertilsin.
2. Osy Jarlyq alǵashqy resmi jariialanǵan kúninen bastap qoldanysqa engiziledi", - delingen Jarlyqta.
Buǵan deiin Senat pen Májilis depýtattary elorda ataýyn ózgertýdi qoldap, daýys bergen bolatyn. Elorda ataýyn Astana dep ózgertý "Konstitýtsiiaǵa ózgerister men tolyqtyrýlar engizý týraly" zań jobasyna engizilgen. Elorda máslihatynda qoǵamdyq tyńdaýlar ótip, onda depýtattar bul bastamany biraýyzdan qoldady.
Eske salaiyq, qyrkúiektiń basynda "Jańa Qazaqstan" depýtattary elordanyń burynǵy ataýyn qaitarýdy usynǵan edi.
Bastamaǵa toqtalǵan premer-ministrdiń birinshi orynbasary Roman Skliar bul ideia qoǵamda burynnan talqylanyp kele jatqanyn aitty. Senat tóraǵasy Máýlen Áshimbaev bolsa, bul usynysta "eshqandai saiasi astar joq" ekenin aitty.
