Elordada ǵimarat salý árdaiym ózekti máselelerdiń biri bolyp keledi. Úi salý úshin ruqsatty qalai alatyny týraly Nur-Sultan qalasy Sáýlet, qala qurylysy jáne jer qatynastary bóliminiń bastyǵy Nurlan Uranhaev aityp berdi, dep habarlaidy QazAqparat.
«Eger adamnyń jer ýchaskesi bolsa jáne ol qala qurylysynyń barlyq normalaryna sáikes kelse, sol jerdiń iesi qurylysty bastamas buryn sáýlet-josparlaý tapsyrmasyn alýy kerek. Bul memlekettik qyzmetti sáýlet, qala qurylysy jáne jer qatynastary bólimi usynady», - dep atap ótti Nurlan Uranhaev.
Sonymen qatar, bul másele memlekettik qyzmet týraly bolǵandyqtan, qujatty berý ýaqyty reglamenttelgen.
«Eger bári sáikes kelse, mysaly, qyzyl syzyqqa kirmegen bolsa, josparǵa sáikes kelse úi salýǵa ruqsat alýǵa bolady. Kelesi qadam – eskizdi jobany kelisý. Bul da Nur-Sultan qalasy Sáýlet, qala qurylysy jáne jer qatynastary bóliminiń memlekettik qyzmetine jatady. Túsindirýdi jeńildetý úshin biz halyqqa arnap qaida barý kerek jáne qandai qujattar qajet ekendigi týraly jadynamalar jasadyq», - deidi spiker.
Sáýlet-josparlaý tapsyrmasyn alyp, aldyn ala jobalaýdy keliskennen keiin tapsyrys berýshi saraptamadan ótip, qurylysty bastaýy kerek.
«Qurylys jumystary aiaqtalǵannan keiin nysan paidalanýǵa beriledi. Zańǵa sáikes Nur-Sultan sáýlet, qala qurylysy jáne jer qatynastary bóliminiń barlyq memlekettik qyzmetteri aqysyz kórsetiledi», - deidi elordanyń bas sáýletshisi.
Eske sala ketsek, Nurlan Uranhaev 2019 jyldyń mamyr aiynda qalanyń sáýlet, qala qurylysy jáne jer qatynastary bóliminiń basshysy bolyp taǵaiyndaldy.
Buǵan deiin ol qalany abattandyrýdyń 2020-2025 jyldarǵa arnalǵan baǵdarlamasy týraly aitqan bolatyn. Onyń aitýynsha, astananyń bes shartty poliortalyqtary damidy. Olar: eski alań aýmaǵy, Beibitshilik kóshesi jáne Bógenbai batyr dańǵyly, «Eýraziia» aýmaǵyndaǵy kósheler, Qosshyǵululy kóshesi, Ázerbaev kóshesi, Qoshqarbaev kóshesi jáne Júrgenov kósheleriniń aýmaǵy.
