«Qazanat» atshabarynda el Táýelsizdiginiń 30 jyldyǵyna arnalǵan báige túrlerinen dástúrli «Elbasy kýbogy» jarysy ótti, dep habarlaidy elorda ákimdiginiń resmi saity.
Dúbirli dodaǵa elimizdiń barlyq óńirinen 150-ge jýyq sáigúlik qatysty.
Shabandozdar báigeniń myna túrlerinen baq synady:
Alaman báige – 25 shaqyrym;
Qostanai tuqymdy jylqy báige – 23 shaqyrym;
Kishi alaman (top) báige – 16 shaqyrym;
Qunan báige – 9 shaqyrym;
Ushqyr attar jyrysy – 1400 m, 2400 m.
Báigeniń saltanatty ashylý rásimine Nur-Sultan qalasynyń ákimi Altai Kólginov, Mádeniet jáne sport ministri Aqtoty Raiymqulova jáne Ulttyq sport qaýymdastyǵynyń prezidenti, QR Parlament májilisiniń depýtaty Bekbolat Tileýhan qatysyp, shabandozdarǵa sáttilik tiledi.
Báige jeńimpazdary men júldegerleri aqshalai syilyqtar jáne diplomdarmen marapattaldy.
Báige túrlerinen dástúrli Elbasy kýbogynyń jeńimpazdary men júldegerleri:
«Qunan» báige boiynsha birinshi oryndy Beknur Jorabek jeńip aldy, ekinshi jáne úshinshi oryndardy Jaqsylyq Abylaihan men Elnur Medetbekov enshiledi.
«Kishi alaman» báigede Jaqsylyq Serikjan 1-oryndy qanjyǵasyna bailasa, Baiqam Asanqulov 2-oryndy, Hakimbek Qojaqov 3-oryndy ielendi.
«Qostanai tuqymdy» jylqylardyń báigesinde Matvei Vatisovtyń tulpary ózgelerden oza shapty. 2-oryndy Halid Abdyrahmanovtyń, al 3-oryndy Nurislam Orazdyń sáigúlikteri jeńip aldy.
«Alaman» báigede Baiqan Asanqulov birinshi bolyp keldi. Nurait Nurbai ekinshi, Ershat Omarǵaliev úshinshi orynǵa jaiǵasty. Al tórtinshi oryn Nurly Shyntasqa buiyrdy.
Aita keteiik, el Táýelsizdiginiń 30 jyldyǵyna arnalǵan báige túrlerinen dástúrli «Elbasy kýbogy» jarysy sanitarlyq normalar men talaptardy qatań saqtai otyryp ótti.
