Elordada Búkilálemdik týristik uiymynyń (UNWTO) qala týrizmine qatysty VIII jahandyq sammiti bastaldy, dep habarlaidy QazAqparat.
Jiynǵa álemniń 80 elinen 1400 qatysýshy jinaldy. Olardyń arasynda tanymal sáýletshiler, jýrnalister jáne memlekettik, týristik uiymdardyń ókilderi bar.
«Búgingi sammit – týristik indýstriiany damytýdaǵy mańyzdy platforma. Qazirgi ýaqytta týrizm jahandyq jalpy ishki ónimniń 10%, jumys oryndarynyń 10% jáne barlyq indýstriianyń 5% quraidy. Jahandyq naryqta týrizm indýstriiasy qarqyndy damyp keledi. Sońǵy 10 jylda týrister sany artty. Bul, týrizmdi nasihattap otyrǵan memleketterdiń ekonomikasy úshin mańyzdy. Sońǵy ýaqytta atalmysh sala qalalardyń turaqty damýyna kómekteskenin kórip otyrmyz. Bizdiń de áleýetti arttyra túsý týraly maqsatymyz bar. Elimizde jáne qalalarymyzda týrizmdi damytý úshin halyqaralyq uiymdar men halyqaralyq kompaniialardy tartqymyz keledi», - dedi QR Premer-Ministri Asqar Mamin samittiń ashylýynda.
QR Premeri Qazaqstan Úkimeti 2019-2025 jyldarǵa arnalǵan Týrizmdi damytý baǵdarlamasyn ázirlegenin eske saldy.
«Baǵdarlamaǵa sáikes, JIÓ-degi týrizm úlesin arttyrǵymyz keledi. Onyń ekonomika damýyna eleýli úles qosqanyn qalaimyz. Týrizmdi damytý úshin memlekettik sektordan da, jeke sektordan da qarjylandyrý qajet. Alaida, bul salada úlken básekelestik bar ekenin de túsinemiz. Nur-Sultan qalasynyń eń úzdik 50 tartymdy týristik baǵyttyń qataryna enýin qalaimyz. Oǵan túrli kedergilerdiń bar ekenin bilemiz. Osyǵan bailanysty, Nur-Sultan qalasyn týrizmdi damytýdaǵy negizgi qala retinde bekitkimiz keledi», - dedi Premer-Ministr.
Onyń aitýynsha, elordada qurylysqa salynǵan investitsiia kólemi artyp, 3,3 trln teńgege nemese 50 mlrd dollarǵa jetken.
«Sonymen birge, biz qala damýy úshin zańnamalyq bazany damytamyz. Nur-Sultan «aqyldy tehnologiialardy» damytýdaǵy basty kúshke ainalyp keledi. Elorda álemniń eń negizgi 10 qalasy retinde damyp keledi dep aitýǵa bolady», - dep atap ótti A. Mamin.
Aita keteiik, qala týrizmi jónindegi UNWTO VIII jahandyq sammitinde «aqyldy qalalardy» damytý arqyly qalanyń ózekti máselelerin sheshý, qalany basqarý, turaqty damý, innovatsiialar men tehnologiialar taqyryptary talqylanady.
