Aqmola oblysynyń Tselinograd aýdany aýmaǵynda jol-kólik oqiǵasy bolyp, 7 adam zardap shekti. Onyń ekeýi — bala, dep habarlaidy "Ult aqparat" oblystyq Politsiia departamentiniń baspasóz qyzmetine silteme jasap.
Vedomstvonyń málimetinshe, jol apaty naýryzdyń 23-inde Nura aýylynan 10 shaqyrym jerde, iaǵni «Nur-Sultan-Qabanbai batyr» avtojolynyń 48 shaqyrymynda oryn alǵan. Bul týraly sol kúni saǵat 10:05 Tselinograd aýdandyq PB kezekshi bólimine jedel járdem feldsheri habarlap aitqan.
«Oqiǵa ornyna jetken tártip saqshylary anyqtaǵandai, Nur-Sultan qalasy baǵytynda júrip bara jatqan Qaraǵandy oblysynyń 36 jastaǵy turǵyny «Gazel» kóligimen joldyń qarsy baǵytyna shyǵyp ketip, 44 jastaǵy astanalyq basqarǵan «Lada Largus» kóligimen soqtyǵysqan. Saldarynan jeńil kóliktiń júrgizýshisi men jolaýshylary (barlyǵy 7 adam, onyń ekeýi bala) zardap shegip, Nur-Sultan qalasynyń №2 qalalyq aýrýhanasyna jetkizildi», - dedi vedomstvodan.
Qazirgi kezde, osyǵan bailanysty Qylmystyq kodekstiń 345 baby boiynsha is qozǵalyp, sotqa deiingi tergeý amaldary júrgizilýde.
