Elordada karantin jariialanǵannan beri blokpostqa kirip-shyǵý tártibin buzǵany úshin 128 adam jazalandy. Onyń 99-y qamaýǵa alynyp, 19 azamatqa aiyppul salyndy, taǵy 10 is sot qaraýyna joldandy, dep habarlaidy "Ult aqparat" Nur-Sultan qalasy ákimdiginiń resmi saityna silteme jasap.
«30 naýryzdan bastap tótenshe jaǵdai rejimi kúsheitildi. Nur-Sultan qalalyq politsiia departamenti infektsiia taralýynyń aldyn alý maqsatynda barlyq qajetti sharalar qabyldaýda. Patrýl politsiia jasaqtary kóbeitildi. Azamattardyń jáne avtokólikterdiń qozǵalysy qalanyń barlyq aýdanynda qatań baqylaýǵa alyndy», deidi qalalyq politsiia departamentiniń baspasóz ókilderi.
Sondai-aq qalada táýlik boiy kezekshilik jumys isteidi. Mobildi toptar jumyldyrylǵan. Blok posttaǵy jaǵdai dron arqyly baqylanady.
Qala aýmaǵy kósheler boiynsha birneshe bólikke bólingen. Onda tártip saqshylary jaǵdaidy qadaǵalap otyrady.
Qalada jalpy sany 26 blokpost qoiylǵan.
Aita ketsek, 28 naýryzdan bastap elorda turǵyndaryna azyq-túlik alýǵa, meditsinalyq qyzmetke júginýge nemese dári-dármek satyp alýǵa jáne arnaiy ruqsat boiynsha jumysqa barýǵa ruqsat etiledi.
Qalǵan azamattardyń úiden shyǵýyna shekteý qoiyldy. Kámelet jasqa tolmaǵandar eresekterdiń qaraýynsyz qalada júrýge bolmaidy.
Otbasy múshelerin qospaǵanda, kóshede 3 adamnan artyq toptalyp júrýge tyiym salynǵan.
