QR Indýstriia jáne infraqurylymdyq damý ministrligi Nur-Sultan áýejaiynyń kody qashan ózgeretinin málim etti, dep habarlaidy "Ult aqparat" ministrliktiń baspasóz qyzmetine silteme jasap.
Qazir áýejaidyń úsh áripten turatyn kodyn ózgertý boiynsha josparly jumys júrip jatyr.
«Biyl 14 qazan kúni Varshavada (Polsha) IATA Jolaýshy tasymaldaý standarttary jónindegi jinalysy (Passenger Standards Meeting) otyrys ótkizdi. Oǵan IATA-nyń barlyq múshesi qatysty. Sharada Qazaqstannyń IATA-nyń №763 Qararyna ózgertýler engizý jónindegi bastamasy qoldaý tapty. Bul Nur-Sultan áýejaiynyń úsh áripten turatyn kodyn (TSE) ózgertýge múmkindik beredi», - delingen habarlamada.
Qazir astana áýejaiynyń jańa kodyna birneshe nusqa usynylǵan. Sońǵy nusqa talqylanyp jatyr.
763-qararǵa ózgertý engizý biraz ýaqytty qajet etedi. Ministrliktiń málimdeýinshe, ózgerister 2020 jyldyń qańtarynda kúshine enýi qajet. Sodan keiin IATA kodtyń sońǵy nusqasyn bekitedi.
