Birinshi satydaǵy sot Nur-Sultan áýejaiynyń áýe kemesiniń bortyna qarýdy alyp júrý boiynsha aqyly qyzmetiniń kúshin joidy, dep habarlaidy QazAqparat.
Bul isti sotta qaraýǵa respýblikalyq «Qansonar» respýblikalyq ańshylar qaýymdastyǵynyń Básekelestikti qorǵaý jáne damytý agenttigine 2021 jylǵy 14 shildedegi ótinishi negiz boldy.
Ótinishte «Nursultan Nazarbaev halyqaralyq áýejaiy» AQ tarapynan áýe kemesine qarý men onyń oq-dárilerin alyp júrý boiynsha qyzmet kórsetkeni úshin bir qyzmet kórsetkeni úshin QQS-ty eskere otyryp, 15 000 teńge mólsherinde qosymsha aqy alý týraly sóz boldy.
Bul rette áýe kemesinde qarý alyp júrgeni úshin kórsetiletin qyzmettiń qunyn aviakompaniialar áýe biletiniń qunyna qosyp ta qoiady. Nátijesinde Nursultan Nazarbaev áýejaiynda jolaýshylar dál sol qyzmet úshin - áýejai men aviakompaniiaǵa eki ese tólem jasaýǵa tiis bolady.
Ótinishti qaraý sheńberinde Agenttik bul qyzmet elordalyq halyqaralyq áýejai qyzmetiniń jeke túri retinde monopoliiaǵa qarsy organmen kelisilmegenin anyqtady. Buryn Astana halyqaralyq áýejaiy aviatsiialyq qaýipsizdikti qamtamasyz etý boiynsha rettelip kórsetiletin qyzmet sheńberinde osy qyzmetti kórsetken bolatyn.
Básekelestikti qorǵaý jáne damytý agenttigi tarapynan materialdar Bas kólik prokýratýrasyna jiberildi.
Nur-Sultan qalasy boiynsha Aviatsiialyq kólik prokýratýrasy materialdardy qaraý nátijeleri boiynsha osy qyzmettiń zańsyzdyǵy týraly narazylyq shyǵardy, oǵan «Nursultan Nazarbaev halyqaralyq áýejaiy» AQ tarapynan osy sheshimmen kelispeitini týraly sotqa talap aryz berildi.
Aǵymdaǵy jylǵy 6 qańtarda Nur-Sultan qalasynyń mamandandyrylǵan aýdanaralyq ákimshilik soty Nur-Sultan qalasynyń áýejaiynda kórsetiletin áýe kemesinde qarý-jaraq pen onyń oq-dárilerin alyp júrý boiynsha aqyly qyzmetti alyp tastaý týraly Aviatsiialyq prokýratýranyń talabyn qanaǵattandyrý týraly sheshim shyǵardy.
Sot sheshimi áli kúshine engen joq.
