Nur-Sultan ákimi Altai Kólginov memleket basshysy Qasym-Jomart Toqaevtyń qabyldaýynda bolyp, tapsyrmalardyń oryndalý barysy men elordanyń damýy týraly baiandady.
Kezdesý barysynda "Januia" otbasy institýtyn qoldaý ortalyǵynyń jumysy, ippoterapiia jáne eki birdei ońaltý ortalyǵyn salý jospary týraly sóz boldy.
"Uly Abaidyń 175 jyldyǵyna orai "Abai álemi" ortalyǵynyń boi kóteretindigi, Sáken Seifýllin, Beiimbet Mailin jáne Iliias Jansúgirovtiń 125 jyldyq mereitoilaryna bailanysty qoladan quiylǵan "Úsh arys" eskertkishi ornatylatyndyǵy týraly aqparat berdim", - dep jazdy qala basshysy instagram paraqshasynda.
Kólginovtiń aitýynsha, QR prezidentiniń tapsyrmasy aiasynda qoljetimdi turǵyn úi qurylysy, úlestik qurylys boiynsha máselelerdi sheshý, qala mańyndaǵy aýmaqtardy damytý, gazben jáne sýmen jabdyqtaýdy jetildirý boiynsha sharalar qabyldanyp jatyr.
Aldaǵy 3 jylda qalany abattandyrý aiasynda jaiaý júrginshilerge yńǵaily bolý úshin 80 km jol men 100 km astam velojol salynady. Jaiaý júrginshiler joly eski alańnan bastaý alyp, qalanyń eki jaǵyn bailanystyrady.
"Sondai-aq, kelesi jyly 260 aýlany abattandyramyz. Oiyn jabdyqtaryn, balalarǵa arnalǵan sport alańdaryn, fýtbol, basketbol jáne taǵy basqa alańdardy ornatamyz", - dep túiindedi ákim
