Nurotandyqtar Ulttyq ekonomika ministrliginiń shaǵyn jáne orta biznesti sýbsidiialaýdy alyp tastaý týraly usynysyna qarsy. Bul jóninde «Nur Otan» partiiasy janyndaǵy Ekonomikany damytý jáne kásipkerlikti qoldaý jónindegi respýblikalyq qoǵamdyq keńestiń kezekti otyrysynda belgili boldy.
Ministrlik keleshekte sýbsidiiadan kepildendirýge aýystyrýǵa den qoimaq. Sondai-aq, salyqtyq yntalandyrý sharalaryn kóbeitýdi josparlap otyr.
«Qazir shaǵyn jáne orta biznesti qoldaýdyń negizgi quraly paiyzdyq mólsherlemeni sýbsidiialaý bolyp otyrǵanyn ministrliktiń esine salamyn. Bul – bankten nesie alý qymbat bolǵandyqtan jasalyp otyrǵan májbúrli shara. Bizde bazalyq mólsherleme tómendep, nesie qoljetimdi bolmaiynsha, sýbsidiialaýdyń kúshin joiý týraly aitýǵa áli erte. Sýbsidiialaý tetigin jaqsartý boiynsha jumys isteýge keńes beremin», - dedi Keńes tóraǵasy, Májilis depýtaty Amanjan Jamalov.
Jiyn barysynda partiia músheleri «Qarapaiym zattar ekonomikasy» baǵdarlamasynyń nátijeliligin de talqylady. Memlekettik organdardyń aqparaty boiynsha 700 mlrd. teńgege myńnan astam jobaǵa qoldaý kórsetilgen.
«Bul jerde olardyń qanshasy iske qosyldy, ár jobanyń júktemesi qandai degen suraqtar týyndaidy. Qarajattyń 20%-y ónerkásipke múldem qatysy joq salalardy qoldaýǵa baǵyttalǵan. Importty almastyrýǵa kelsek, Ulttyq ekonomika ministrligi tamaq ónimderin óndirýmen ainalysatyn 144 qarjylandyrylǵan kásiporyn 2020 jyly osyndai ónimderdiń jalpy importynyń 94% óndirdi dep kórsetedi. Alaida Ulttyq statistika biýrosynyń málimetteri muny rastamaidy», - dedi Amanjan Jamalov.
Nurotandyqtar importty almastyrý boiynsha jumys nátijeleriniń tómendigin Indýstriia jáne infraqurylymdyq damý ministrligi de kórsetip otyr dep esepteidi.
«Indýstriia jáne infraqurylymdyq damý ministrligi negizinen qurylys indýstriiasynyń jobalaryn usyndy. Qazirgi tańda qurylys materialdarynyń importy 1 mlrd. AQSh dollarynan asady, al óńdeý ónerkásibiniń barlyq importy 35 mlrd. AQSh dollarynan assa, onyń basym bóligi mashina jasaý, himiia ónerkásibi, metallýrgiia, jeńil ónerkásip, farmatsevtika salalaryna tiesili. Nege bul salalar boiynsha jobalar joq? Iaǵni, memleket qarajat bóledi, zaýyttar ashyldy dep esep beremiz, biraq statistika men importtyq taýarlar baǵasynyń ósýine qarasaq, jaǵdai basqasha. Jaýapty vedomstvolar bul máselelerge baiypty qaraý qajet», - dep atap ótti Keńes tóraǵasy.
Jiyn qorytyndysy boiynsha Ulttyq ekonomika ministrligine kásipkerlerdi sýbsidiialaý tetikterin jaqsartý boiynsha jumys júrgizý, sondai-aq «Qarapaiym zattar ekonomikasy» baǵdarlamasy boiynsha iske asyrylǵan jobalarǵa tekserý júrgizý usynyldy. Indýstriia jáne infraqurylymdyq damý ministrligine salalar boiynsha importty almastyrý josparyn ázirleý jáne árbir kásiporyndy naqty qoldaýmen qamtamasyz etý usynyldy.
