Elbasy, Partiia Lideri Nursultan Nazarbaevtyń tóraǵalyǵymen ótetin Saiasi keńestiń keńeitilgen otyrysy qarsańynda elimizdiń barlyq óńirlerinde saiasi keńester biýrosynda filial basshylary – ákimderdiń qatysýymen «Nur Otan»-nyń 217 sailaýaldy baǵdarlamasyn júzege asyrýdyń aralyq qorytyndylary qaraldy, dep habarlaidy "Ult aqparat".
Partiianyń baspasóz qyzmetinde atap ótkendei, Memleket basshysy Qasym-Jomart Toqaev jariia etken «Ózgerister joly: Ár azamatqa laiyqty ómir!» respýblikalyq sailaýaldy baǵdarlamanyń 24,8% oryndalyp úlgerdi. 9 aida óńirlerde 10,4 mln sharshy metr turǵyn úi paidalanýǵa berilip, 165 mektep salyndy, 259 myńnan astam turaqty jumys orny ashyldy.
Nur-Sultan qalasynda jyl basynan beri 115 kóshe jóndelip, 4885 úi gazben jabdyqtaý júiesine qosyldy. Almatyda 72 jeke menshik balabaqsha ashylyp, 9 mektepke qosymsha korpýstardyń qurylysy aiaqtaldy. Shymkentte 5 meditsinalyq mekeme men 115 sport alańy salyndy.
Aqmola oblysynda biyl 48 et jáne 10 sút-taýar fermasy iske qosyldy. Aqtóbe oblysynda partiianyń sailaýaldy baǵdarlamasy aiasynda 488 myń sharshy metr turǵyn úi paidalanýǵa berildi. Almaty oblysynda 12 mektep jáne 135 balabaqsha ashyldy. Atyraý oblysynda 6 mektepte inkliýziiany qoldaý kabinetteri ashyldy.
Shyǵys Qazaqstan oblysynyń Semei qalasynda Iadrolyq meditsina ortalyǵy paidalanýǵa berildi. Al Óskemende oblystyq onkologiia jáne hirýrgiia ortalyǵyndaǵy operatsiialyq blokty jańǵyrtý jumystary aiaqtaldy.
Jambyl oblysynda erekshe qajettilikteri bar azamattar úshin kedergisiz orta qurý maqsatynda qaladaǵy 255 nysan tolyǵymen beiimdeldi. Batys Qazaqstan oblysyndaǵy Syrym aýdanynyń 6 aýylynda sýmen jabdyqtaý nysandarynyń qurylysy aiaqtaldy.
Qostanai oblysynda aýyl sharýashylyǵy tehnikasyn shyǵaratyn tseh óz jumysyn bastasa, budan bólek meditsinalyq jabdyqtar men ońaltýdyń tehnikalyq quraldaryn óndiretin tseh ta paidalanýǵa berildi. Qaraǵandy oblysynda 1,4 myń shaqyrym jol jóndeldi. Qyzylorda oblysynda 363 shaqyrym gaz jelisi tartylyp, oǵan 38 myń halqy bar 3 eldi meken qosyldy.
Pavlodar oblysynyń agroónerkásiptik kesheninde jalpy somasy 4,7 mlrd.teńge bolatyn 8 joba sátti iske asty. Mańǵystaý oblysynda 28 mektep salyndy jáne jóndeldi.
Soltústik Qazaqstan oblysynda sailaýaldy ýádelerdi oryndaý aiasynda 12 myńǵa jýyq turaqty jańa jumys orny ashyldy. Túrkistan oblysynda jyl sońyna deiin 717 eldi meken sapaly aýyz sýǵa qol jetkizip, óńirdiń taǵy 65 myń turǵyny tabiǵi gazben qamtamasyz etiledi.
Eske sala keteiik, Elbasy, Partiia Lideri Nursultan Nazarbaevtyń tapsyrmasy boiynsha «Nur Otan» partiiasynyń sailaýaldy ýádelerin iske asyrýdy júieli baqylaýdy qamtamasyz etý úshin jaýapty depýtattar men basshylardy naqty bekite otyryp, 217 jol kartasy iske asyrylýda. 12 myńnan astam belsendi azamattyń qatysýymen 1,7 myńnan astam qoǵamdyq keńesten turatyn óńirlik júie quryldy.
