Saiasi keńestiń aimaqtyq biýrosynyń usynysmen Beisenbai Tájibaev «Nur Otan» partiiasy Túrkistan oblystyq filialy tóraǵasynyń birinshi orynbasary bolyp taǵaiyndaldy, dep habarlaidy partiianyń baspasóz qyzmeti.
Beisenbai Tájibaev buǵan deiin Túrkistan oblystyq Ishki saiasat basqarmasynyń basshysy qyzmetin atqardy.
Buǵan deiin «Nur Otan» partiiasy tóraǵasynyń birinshi orynbasary Baýyrjan Baibek elimizdiń birneshe oblystaryn aralap, onda jergilikti atqarýshy organ basshylarynyń partiialyq jaýapkershiligin kúsheitý jáne barlyq deńgeidegi máslihattardaǵy depýtattyq fraktsiialardyń rólin arttyrý týraly birqatar máseleler talqylanǵan. Onyń ishinde tez arada sheshimin tabýy tiis problemalyq obektiler jeke partiialyq baqylaýǵa alynǵan bolatyn.
Arys qalasyna jasaǵan is-saparynan soń Baýyrjan Baibek óziniń Twitter-degi paraqshasynda partiiaǵa «Nur Otan»-nyń Túrkistan oblystyq filialy birinshi orynbasarynyń ústinen kóptegen shaǵymdar túskenin jazdy.
«Filial tóraǵasymen kelise otyryp, bul máseleni Saiasi keńestiń aimaqtyq biýrosynda qarap, N.Joldasovty partiia qatarynan shyǵarýǵa deiin shara qoldaný kerek dep esepteimin. Jalpy, halyqtyń partiiaǵa degen senimin arttyrý úshin partiialyq tártipti túbegeili kúsheitip, ishki «tazartý» jumystaryn júrgizý qajet», – dedi ol.
Aita ketý kerek, «Nur Otan» partiiasynyń Lideri Nursultan Nazarbaevtyń partiiany «qaita júkteý» jáne kadrlardy jańartý jónindegi tapsyrmasyna sáikes, buǵan deiin Erlan Kanalimov Nur-Sultan qalasyndaǵy partiia filialy tóraǵasynyń birinshi orynbasary bolyp taǵaiyndalǵan bolatyn.
