Smaiylov «Nur Otan» partiiasynyń sailaýaldy baǵdarlamasyn iske asyrý jónindegi shtab otyrysyn ótkizdi

Stýdentterge jataqhanadan oryn berý, halyqtyń áljýaz toptaryna áleýmettik kómek tóleý, múmkindigi shekteýli jandarǵa infraqurylymdy jaqsartý máseleleri «Nur Otan» partiiasynyń sailaýaldy baǵdarlamasyn iske asyrý jónindegi shtab otyrysynda qaraldy, dep habarlaidy primeminister.kz.

Úkimette Premer-Ministrdiń birinshi orynbasary Álihan Smaiylovtyń tóraǵalyǵymen shtabtyń kezekti otyrysy ótti.

Talqylaýǵa túsken máselelerdiń biri 2025 jylǵa qarai kolledjder men ýniversitetterdiń jataqhanalarynda keminde 50 myń jańa oryndy paidalanýǵa berý boldy.

Biylǵy 1 qyrkúiektegi jaǵdai boiynsha 1924 orynǵa arnalǵan 10 jataqhana paidalanýǵa berildi. Osy jyldyń aiaǵyna deiin 12 185 oryndyq qosymsha 37 jataqhanany paidalanýǵa berý josparda bar.

Kezdesý qorytyndysy boiynsha qysqa merzimde múddeli memlekettik organdarǵa memlekettik tapsyrysty ornalastyrý mehanizmin jetildirý boiynsha usynystardy qaraý týraly buiryq berildi.

Sondai-aq jalǵyzbasty qart azamattarǵa qosymsha áleýmettik qoldaý túrleri boiynsha aqparat berildi, atap aitsaq: ómirinde qiyn jaǵdai bolǵan kezde birjolǵy materialdyq kómek kórsetý, dári-dármekpen qamtamasyz etý, sanatoriia-kýrorttyq emdelý, turǵyn úidi jóndeý. 

Erekshe qajettilikteri bar adamdar úshin pandýstarmen, arnaiy lifttermen, dárethanalarmen jáne zaǵip jandarǵa baǵyttaýysh belgilermen qamtamasyz etý sekildi infraqurylymdy jaqsartý máselesi qaraldy. 

Qoǵamdyq baqylaýdyń aimaqtyq toptarynyń monitoring obektileri boiynsha jumysy jandandyrylýda.

Sonymen qatar múgedekterdi jumysqa ornalastyrý boiynsha júrgizilip jatqan jumystar talqylandy. 

Birinshi jartyjyldyqtyń qorytyndysy boiynsha jumyspen qamtylǵan múgedekter úlesi jumyspen qamtý ortalyqtaryna júgingen eńbekke jaramdy múgedekterdiń 29,7% quraidy.

Premer-Ministrdiń birinshi orynbasary múgedekterdi jumyspen qamtý máseleleri boiynsha qoldaý sharalary keshenin qarastyrýdy (oqytý, jumys oryndaryn qaita jabdyqtaý, jalaqynyń bir bóligin sýbsidiialaý, jumyspen qamtý kvotasynyń saqtalýyn baqylaý) qamtamasyz etýdi jáne jumyspen qamtý máselesine erekshe nazar aýdarýdy tapsyrdy. 

Bul sharalar 2025 jylǵa deiin ázirlengen Ulttyq jumyspen qamtý jobasynda kórinis tabýy tiis.