«Nur Otan» partiiacynyń Ortalyq apparatynda partiia janyndaǵy Quqyqtyq keńestiń 2020 jylda atqarǵan jumysynyń qorytyndysy talqylanyp, kelesi jyldyń jospary qarastyryldy, dep habarlaidy "Ult aqparat".
Keńes tóraǵasy, Qazaqstan Respýblikasy Parlamenti Májilisiniń Zańnama jáne sot-quqyqtyq reforma komitetiniń jetekshisi Qanat Mýsin 10 jyl ishinde Zań keńesi zańnamalyq normalardy jetildirý boiynsha usynystardy talqylaý men ázirleý úshin tiimdi alań bolǵanyn aitty.
Keńes tóraǵasy 2020 jyly atqarylǵan isterdi qorytyndylai kele, 8 otyrys barysynda Ákimshilik is júrgizý kodeksi jobasynyń qoldanystaǵy erejeleri, Qoǵamdyq keńesterdiń tiimdiligin arttyrý máseleleri, ekologiialyq zańnamanyń jańashyldyǵy, shaǵyn jáne orta biznesti zańnamalyq qoldaý máseleleri talqylandy dep atap ótti.
Atap aitqanda, qazan aiynda Ekologiialyq kodeks jobasyn talqylaý qorytyndysy boiynsha Quqyqtyq keńes 13 usynym ázirlep, Úkimetke joldaǵan, onyń 4-ýi zań jobasynda eskerildi.
Quqyqtyq keńestiń biylǵy keńeitilgen qorytyndy jiyny pandemiia men ekonomikalyq jaǵdaidyń nasharlaýy jaǵdaiynda shaǵyn jáne orta biznesti zańnamalyq qoldaý máseleleri boiynsha ótti. Talqylaýdan keiin zańnamaǵa investitsiialardy tartý jáne qoldaý, investitsiialar týraly strategiialyq kelisimdi engizý máseleleri boiynsha ózgerister usynyldy. Nátijesinde Úkimetke 12 usynys jiberildi.
2021 jylǵa arnalǵan jumys josparyn talqylaý kezinde Quqyqtyq keńes músheleri eldiń joǵary oqý oryndarynda quqyqtyq bilim deńgeiin kóterýge, bitimgershilik rásimderi men mediatsiiany jetildirýge nazar aýdarý qajettigin atap ótti.
Sondai-aq, Keńes qyzmetiniń 10 jyldyǵyna orai ótken jiyn barysynda onyń belsendi músheleri azamattardyń quqyqtary men zańdy múddelerin qorǵaýdy qamtamasyz etýge qosqan zor úlesi úshin qurmet gramotalarymen marapattaldy.
Olardyń qatarynda QR Parlamenti Senaty Tóraǵasynyń orynbasary Nurlan Ábdirov, Májilis depýtaty Gúlnar Bijanova, «Astana» Halyqaralyq ǵylymi kesheniniń qylmystyq ádilet ortalyǵynyń jetekshisi, professor Isidor Borchashvili, M.Nárikbaev atyndaǵy QazMZÝ-dyń qylmystyq sot tóreligi jáne ǵylymi-quqyqtyq saraptama boiynsha ǵylymi jobalardyń jetekshisi, professor Marat Qoǵamov, Joǵarǵy Sot Keńesiniń múshesi Balgúl Raisova, Kásipodaqtar federatsiiasy tóraǵasynyń orynbasary Muhtar Tinikeev jáne taǵy basqalar bar.
