Raýan Kenjehanuly «Nur Otan» partiiasy Tóraǵasy birinshi orynbasarynyń keńesshisi bolyp taǵaiyndaldy, dep habarlaidy "Ult aqparat".
«Raýan kópshilikke belgili jýrnalist, qoǵam qairatkeri, kóptegen jobalardyń avtory retinde jaqsy tanymal. Onyń bastamasymen júzege asyrylǵan jobalar qazaqstandyqtardyń ziiatkerlik áleýetin arttyryp, otandyq bilim salasynyń jańa úrdisterge sai damýyna jol ashty. Sondai-aq Raýan Kenjehanuly áigili Vikipediiany qazaqsha sóiletip, ana tilimizdiń aiasyn keńeitýge úlken úles qosty. Qazaq tiliniń Google aýdarma júiesine engizilýine de sińirgen eńbegi zor», - dep jazdy «Nur Otan» partiiasy Tóraǵasynyń birinshi orynbasary Máýlen Áshimbaev Feisbýktegi paraqshasynda.Sonymen qatar ol Raýan Kenjehanulynyń memlekettik qyzmette de ózin jaqsy qyrynan kórsetip, mol tájiribe jinaǵanyn, «Rýhani jańǵyrý» baǵdarlamasy aiasynda qolǵa alynǵan «Qazaq tilindegi 100 jańa oqýlyq» jobasyn júzege asyrýda eren eńbek etkenin basa aitqan. «Ol basqaratyn «Ulttyq aýdarma biýrosy» sáýir aiynda jobanyń alǵashqy jemisi retinde álemniń eń úzdik joǵary oqý oryndarynda oqytylatyn 18 oqýlyqty qazaq tiline aýdarǵanyn jaqsy bilemiz. Aldaǵy ýaqytta da Raýan rýhani jańǵyrý aiasyndaǵy jumystardy jalǵastyryp, onyń basshylyǵymen aýdarma biýrosy mundai oqýlyqtardyń qataryn tolyqtyra túsedi degen oidamyz jáne soǵan tilektespiz. Sonymen qatar Raýan Kenjehanuly basqa da tyń jobalardy partiia qatarynda júrip júzege asyrady dep senemiz. Ol úshin partiia jan-jaqty qoldaý kórsetýge daiyn. Sondyqtan Raýanǵa aldaǵy qyzmetine tek tabys pen sáttilik tileimiz!», - dep atap ótti ol.
