«Nur Otan» partiiasy Tóraǵasynyń Birinshi orynbasary Máýlen Áshimbaev Qazaqstan Jazýshylar odaǵynyń múshelerimen jáne elimizdiń ziialy qaýym ókilderimen kezdesip, Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda kórsetilgen mindetterdiń mańyzyn talqylady.
Sondai-aq otyrysta Joldaýda aitylǵan usynystardyń mánin halyqqa túsindirý jumystaryn birlesip atqarý jaiy da sóz boldy. «Nur Otan» partiiasy Tóraǵasynyń Birinshi orynbasary Elbasy usynystarynyń bir rettik emes, kerisinshe júieli sipatqa ie ekenine nazar aýdaryp:
– Elbasynyń Joldaýdaǵy ár usynysynyń strategiialyq mańyzy zor. Máselen, eń tómengi jalaqyny 1,5 esege kóbeitý – milliondaǵan qazaqstandyqtyń turmys deńgeiine oń áserin tigizetin shara. Sol siiaqty, densaýlyq saqtaý men bilim berý salasyna bólinetin qarajat ta kóbeietin bolady. Bul sharalardyń bári júieli túrde Qazaqstandaǵy áleýmettik jaǵdaidy odan ári damytýǵa tyń serpin beredi, – dedi.
Odan bólek, jiynda Joldaýdaǵy basymdyqtardy júzege asyrý – elimizdi álemniń eń damyǵan elderimen teńestiretin asa mańyzdy qadam ekeni aityldy. Sol sebepti de «Nur Otan» partiiasy Memleket basshysynyń senimdi saiasi tiregi retinde Joldaýdyń máni men mańyzyn halyqqa keńinen túsindirip, Elbasy usynystaryn júzege asyrýǵa úles qosyp, osy baǵyttaǵy jumystarǵa júieli túrde qoǵamdyq baqylaý júrgizetin bolady.
«Nur Otan» bul jumystardy elimizdegi jetekshi saiasi partiialarmen, qoǵamdyq birlestiktermen jáne úkimettik emes uiymdarmen birlesip júzege asyrmaq. Óitkeni mundai aýqymdy jumysqa búkil qoǵam bolyp jumylýdyń bereri mol ekeni sózsiz.
– Eldiń igiligine baǵyttalǵan bul isten Jazýshylar Odaǵy da tys qalmaidy dep senemiz. Óitkeni halyqqa eń jaqyn toptyń biri, sizder, iaǵni aqyn-jazýshylar ekeni belgili. Búgingi kezdesýimizdiń de basty sebebi – osy Joldaýdyń basymdyqtaryn talqylap, halyqqa túsindirý boiynsha birlesken jumystarymyzdyń baǵyttaryn aiqyndap alý, – dedi Máýlen Áshimbaev.
Elbasy Joldaýda «Rýhani jańǵyrý» baǵdarlamasyn ári qarai jalǵastyryp, onyń aiasyn jańa mazmunmen jáne baǵyttarmen tolyqtyrý qajet ekenin aitqany belgili. Sondyqtan atalǵan is-shara barysynda osy máselege de erekshe kóńil bólindi. Osyǵan orai partiia aqyn-jazýshylardy qoldaý maqsatynda tórt birdei joba usynyp otyrǵanyn atap ótken jón.
Osy bastamalardy birlesip júzege asyrý maqsatynda partiia men Jazýshylar odaǵy arasyndaǵy ózara yntymaqtastyqty nyǵaitý týraly memorandýmǵa qol qoiyldy.
Bul qujat negizinde, taraptar jas aqyn-jazýshylardy yntalandyrý maqsatynda ádebi baiqaý ótkizbek. Nátijesinde 5 nominatsiia boiynsha 15 jeńimpazǵa arnaiy júlde beriledi. Sondai-aq, «Rýhani jańǵyrý» baǵdarlamasy boiynsha «Astana» telearnasynda telejoba ashylmaq jáne de kovrking-ortalyqtarda jas qalamgerlermen kezdesý keshteri uiymdastyrylady. Tórtinshi joba boiynsha, YouTube áleýmettik jelisinde arnaiy kanal ashyp, kórermenderge tárbielik sipattaǵy kórkem dúnieler usyný jaily kelisimge keldi.
Aita keteiik, is-sharaǵa Jazýshylar odaǵynyń tóraǵasy Ulyqbek Esdáýlet, «Miras» respýblikalyq keńesiniń tóraǵasy, Májilis depýtaty Bekbolat Tileýhan, dramatýrg, jazýshy Tólen Ábdik, jazýshy Aldan Smaiyl, Májilis depýtaty Saýytbek Ábdirahmanov, aqyn Baýyrjan Qaraǵyzuly jáne basqa da qalamgerler qatysyp, kóterilgen máseleler boiynsha óz oilarymen bólisti.
