Úkimet otyrysynda Premer-Ministrdiń birinshi orynbasary Álihan Smaiylov «Nur Otan» partiiasynyń sailaýaldy baǵdarlamasyn iske asyrý jónindegi jol kartasynyń is-sharalaryn oryndaý tetikteri týraly baiandady, dep habarlaidy QazAqparat.
«Elbasy men Memleket basshysynyń tapsyrmalaryna sáikes Nur Otan partiiasynyń «Ózgerister joly: Ár azamatqa laiyqty ómir!» atty sailaýaldy baǵdarlamasyn sapaly ári tolyqqandy iske asyrý kerek. Osy maqsatta Úkimet «Nur Otan» fraktsiia jáne partiianyń ortalyq apparatymen birlesip arnaiy Jol kartasyn ázirledi. Jol kartasy Sailaýaldy baǵdarlamanyń 4 baǵytyn iske asyrý boiynsha 362 tarmaqty qamtidy», - dedi Smaiylov.
Onyń aitýynsha, Jol kartasynyń barlyq nysanaly sharalary men indikatorlary jaýapty memlekettik organdardy bekite otyryp, jyldar, salalar jáne óńirler boiynsha bólinedi. Biylǵy 12 aqpanda Jol kartasy Parlament Májilisi depýtattarynyń qatysýymen ótken «Nur Otan» partiiasy fraktsiiasynyń otyrysynda talqylaýǵa shyǵarylyp, maquldandy.
«Partiia fraktsiiasy jyl saiyn aqpan aiynda Jol kartasyn iske asyrý barysy týraly Úkimetti tyńdaýdy josparlap otyr. Osyǵan bailanysty, tiisti qadamdar usynylady: Jol kartasyn júzege asyrý boiynsha Shtab qurý. Bul rette, jumys organy bolyp Ulttyq ekonomika ministrligi belgilenedi. Shtab otyrysy aptasyna bir ret ótetin bolady, onda Jol kartasynyń is-sharalaryn iske asyrý máseleleri qaralady. Shtabtyń jumysy boiynsha Premer-Ministrge baiandalyp turady», - dedi Úkimet basshysynyń birinshi orynbasary.
Ekinshiden, árbir ortalyq memlekettik jáne jergilikti atqarýshy organda jaýapty oryndaýshy retinde birinshi basshynyń orynbasary bekitiliýi kerek jáne Jol kartasynyń iske asyrylýyn monitoringileý ári taldaýmen ǵana ainalysatyn jobalaý toptary qurylýy kerek.
«Úshinshiden, Ulttyq ekonomika ministrligi múddeli memlekettik organdarmen birlesip: indikatorlardyń serpindi jáne turaqty monitoringin qamtamasyz etý úshin Jol kartasy kórsetkishteriniń tsifrlyq kartasyn ázirleý kerek. Shtabtyń qaraýyna shyǵara otyryp, Jol kartasynyń nysanaly indikatorlaryna turaqty monitoringti júzege asyrý qajet. Jol kartasy – partiianyń baǵdarlamasyn iske asyrý boiynsha Úkimettiń aldaǵy 5 jylǵa arnalǵan naqty is-qimyl jospary. Barlyq sharalardy sapaly iske asyrý halyqtyń ómir súrý sapasy men ál-aýqatyn arttyrýǵa múmkindik beredi», - dedi Álihan Smailov.
