Indýstriia jáne infraqurylymdyq damý ministrliginiń jáne jergilikti atqarýshy organdardyń jolaýshylar jáne júk tasymalyn damytý baǵytyndaǵy jumysy kóńil kónshitpeidi. Bul týraly «Nur Otan» partiiasy Partiialyq baqylaý komitetiniń kezekti otyrysynda belgili boldy, dep habarlaidy "Ult aqparat".
Qazaqstan avtomobil konventiniń prezidenti Marat Berqalievtiń aitýynsha, zań jergilikti atqarýshy organdardy tasymaldaýshy kompaniialardyń shyǵyndaryn sýbsidiialaýǵa mindettegenimen, kóptegen óńirler bul talapty oryndaýǵa asyǵar emes. Nátijesinde, tasymaldaýshylarǵa ainalym qarajaty jetispei, kólik júrgizýshiler men mehanikterge jalaqy tólei almai, sonyń saldarynan únemi maman tapshylyǵyna tap bolyp otyr. Al avtoparkti jańartyp alǵandarǵa lizingtik tólemderge aqsha jetpeidi.
Jiyn barysynda partiialyqtar óńirlerdegi qoǵamdyq kólikpen bailanysty máselelerge de toqtaldy. Máselen, Jezqazǵanda «Bekbolatsai» shaǵynaýdanynyń 3 myń turǵyny avtobýs qatynasysyz qalǵan. Qyzylorda turǵyndary avtobýstardyń qatynaý kestesiniń óte yńǵaisyzdyǵyna shaǵymdanady. Munda ortalyq kóshelerde marshrýttar qaitalansa, al shalǵai aýdandarǵa qatynamaidy.
Taǵy bir ózekti másele – belgilengen ostik júktemeden asatyn aýyr júk kólikteriniń jol tósemin merziminen buryn buzýy.
«Mańǵystaý oblysynyń Shetpe aýylynda eki jyl buryn jol jóndelip edi. Biraq karerlik samosvaldar sol joldardy typ-tipyl etti. Endi ony qaita jóndeý qajet, oǵan respýblikalyq biýdjetten taǵy 800 mln. teńge bólindi. Qazirgi ýaqytta elimizdegi joldardyń tek 9,3%-y bir oske 10 tonnadan astam aýyrlyqqa shydas bere alady. Osy máseleni sheshýge tiisti deńgeide kóńil bólinbei keledi», - dedi komitet múshesi Dáýren Bijumanov.
Nurotandyqtar tranzittik avtojoldardyń sapasyna erekshe nazar aýdardy. Komitette atap ótkendei, Orynbor, Cheliabinsk, Qorǵan, Omby, Jańasibir baǵytyndaǵy avtojoldardyń basym bóligi zamanaýi standarttarǵa sáikes kelmeidi. Merdigerler jol salý jáne jóndeý kezinde ushyrasatyn problemalardyń biri – jol-qurylys materialdarynyń qymbattaýy.
Joǵaryda aitylǵandardy eskere otyryp, Komitet Indýstriia jáne infraqurylymdyq damý ministrligine joldardy ortasha jóndeý úshin tehnikalyq qujattamanyń saraptamasyn akkredittelgen uiymdarǵa berýdi, joldardy ortasha jóndeýdiń 1 shaqyrymyna jumsalatyn shyǵyndar limitin belgileýdi, sondai-aq kelesi jyldyń 1 qańtaryna deiin barlyq avtojoldar jai-kúiiniń biryńǵai kartasyn jasaýdy usyndy.
Sonymen qatar, Partiialyq baqylaý komiteti jumysynda jibergen olqylyqtary úshin «QazAvtoJol» UK» AQ basqarma tóraǵasy Asqar Muratulyna «eskertý», Temirtaý qalasynyń ákimi Qairat Begimovke, Mańǵystaý oblysynyń jolaýshylar kóligi jáne avtomobil joldary basqarmasynyń basshysy Adaibek Qalievke «sógis» túrindegi partiialyq jaýapkershilikke tartý týraly qaýly shyǵardy.
Indýstriia jáne infraqurylymdyq damý ministrine Avtomobil joldary komitetiniń tóraǵasy Tólegen Abdýllin men Kólik komitetiniń tóraǵasy Samat Gilimovqa tártiptik jaza qoldaný usynyldy.
