Nur-Múbarak Egipet islam mádenieti ýniversitetiniń prorektory, islamtaný ǵylymy boiynsha PhD doktor, dotsent Qairat Qurmanbaev pen Nur-Múbarak ýniversitetiniń PhD doktoranty, «Islamtaný» kafedrasynyń oqytýshysy Nurjan Stambakievtyń birlesip jazǵan «Namaz oqymaityn adam – KÁPIR» deitinderge jaýap» atty kitaby jaryq kórdi, dep habarlaidy "Ult aqparat" oqý ornynyń baspasóz qyzmetine silteme jasap.
Avtorlardyń jańa týyndysy QR Aqparat jáne qoǵamdyq damý ministrligi Din isteri komiteti tarapynan júrgizilgen dintaný saraptamasynyń talaptarynan ótip, QMDB-nyń saraptaý komissiiasynan oń baǵasyn aldy.
Kitap qoǵamda pikirtalas týdyrǵan dini máselelerdiń biri – namaz oqymaityn adamnyń úkimi talqylanady. Taqyrypqa qatysty áhlý sýnna ǵylymdarynyń ustanymy basqa kózqarastarmen salystyryla otyryp, teologiialyq, dini-quqyqtyq turǵyda zertteledi.
Qairat Qurmanbaev: «Pikir pliýralizmi pendeniń peshenesinde bar, tabiǵatyna tán qubylys. Keńistik pen ýaqyt, qoǵam men tulǵa, shariǵat pen zań, túsinik pen qundylyqtar ózgerýge beiim. Sondyqtan qai kezde bolmasyn dini kózqarastar men dini túsinik alýandylyǵynyń týyndaýy zańdy. Alaida ár túrli kózqarasta bolý (ihtilaf) talas-tartysqa, janjalǵa (hilaf) ulassa, qoǵam turaqtylyǵyna syzat túsiredi. Al turaqtylyq pen beibit ómir – baǵa jetpes bailyq ári úlken nyǵmet. Osy oraida qoǵamda keibir din ustanýshylar tarapynan týyndaityn qaterdiń aldyn alý, shetin top ókilderin ońaltý jumystaryna úles qosý maqsatynda, ortada dini alaýyzdyqqa sebep bolyp júrgen negizgi taqyryptarǵa jeke-jeke arnaiy shaǵyn eńbek jazýdy qolǵa aldyq. Sonyń alǵashqysy – «Namaz oqymaityn adam – KÁPIR» deitinderge jaýap.
Namaz oqymaityn adamdy kúpirlikpen aiyptaityn, tipti ata-anasy men óziniń týǵandaryn namaz oqymaǵany úshin jat kórip júrgender osy kitap arqyly aqiqatty túsinip jatsa, maqsatymyz oryndalǵany», – dep kitap týraly pikirin bildirdi.
Ýniversitet prorektorynyń sózine súiensek, jýyrda deradikalizatsiia baǵytyndaǵy ózekti taqyryptarǵa arnalǵan kelesi kitaptar jaryq kóredi.
Dini máselerdiń 1-shi seriiasymen oqyrmanǵa usynylǵan «Namaz oqymaityn adam – KÁPIR» deitinderge jaýap» atty eńbektiń ereksheligi – kitap eki tilde bir muqabada (qazaq tilinde 74 bet, orys tilinde 74 bet) jazylǵan. Jalpy alǵanda týyndy 148 betten turady.
Nur-Múbarak baspasynan shyqqan enbek islamtanýshylarǵa, dintanýshylarǵa, deradikalizatsiia baǵytyndaǵy mamandandarǵa arnalǵan.
Jańa kitapty oqý úshin 8 (701)-677-75-77 nómirine habarlasyp, tapsyrys berýge bolady.
