7 qyrkúiekte elordanyń eń tanymal kórikti jerleriniń biri - NUR ALEM sferasy kelýshilerge esigin aiqara ashady. Murajai jumys kúnderi saǵat 10.00-den 20.00-ge deiin úzilissiz jumys isteidi, dep habarlaidy "Ult aqparat".
Elorda turǵyndary men qonaqtary NUR ALEM-ge kelgende koronavirýs infektsiiasy taralmas úshin sanitarlyq talaptardy ustanýy qajet. Kelýshiler meditsinalyq maska kiip, áleýmettik qashyqtyqty saqtaýy tiis. Murajaiǵa kirgen kezde kelýshilerdiń dene qyzýy arnaiy qurylǵymen ólshenedi, sonymen qatar obektide antiseptik pen sanitaizer ornatylǵan.
Murajaiǵa kelýshilerdi sfera pishindi biregei ǵimarattyń segiz qabaty boiynsha qyzyqty ekskýrsiialar kútedi. Birinshi deńgeide «Ulttyq pavilon» ornalasqan, onda Qazaqstannyń landshaftary, mádenieti, tarihy, búgini men bolashaǵy kórsetilgen.
2-7 qabattarda kelýshiler ǵarysh, kún, jel, sý, biomassalar men kinetikalyq energiiaǵa arnalǵan ekspozitsiialarmen tanysa alady. Munda bógettiń kórkemdik qondyrǵylary, kinetikalyq energiiaǵa qatysty tarihi artefaktiler usynylǵan.
Jel alleiasynda kelýshiler jeldiń ártúrli jyldamdyǵyn sezine alady. Eń joǵarǵy qabatta týristerdiń nazaryna Qazaqstan astanasynyń bolashaǵyn kórsetetin ekspozitsiia usynylady.
Qalanyń músin modeli turaqty damý men ekologiialyq tiimdilikti sipattaidy. Sondai-aq barlyq qabattarda robot-gidter jumys isteidi.
Eske sala keteiik, murajaiǵa bir ret kirý biletiniń baǵasy - 1500 teńge.
QR azamattarynyń belgili bir sanattary úshin jeńildikter qarastyrylǵan: oqýshylar men zeinetkerler úshin bilet quny - 500 teńge, stýdentter úshin – 800 teńge.
UOS ardagerleri, barlyq toptaǵy múgedekter, jetim balalar, kópbalaly analar jáne 6 jasqa deiingi balalar NUR ALEM-ge tegin kire alady. Azamattar ózimen birge jeke kýálik pen jeńildikti rastaityn qujat ala kelýi kerek.
Kelýshilerge yńǵaily bolýy úshin NUR ALEM bolashaq energiiasy murajaiynda 3 myń kólikke arnalǵan jerasty turaǵy táýlik boiy jumys isteidi.
