Táýelsizdiktiń 30 jyldyǵy jetistikterdi saralap, keleshekti aiqyndaityn jaýapty kezeń. Norvegiianyń burynǵy premer-ministri jáne Hristian-demokratiialyq partiiasynyń jetekshisi Kell Magne Bondevik «Vårt Land» (Bizdiń jer) gazetinde osyndai oi aitty, dep habarlaidy QazAqparat.
«Osydan 30 jyl buryn Sovet odaǵy ydyrap, birneshe el qaitadan táýelsiz memleket atandy. Olardyń biri Qazaqstan edi. Bul el ornalasqan jeri men saiasatyna qarai Eýropaǵa bastaityn kópir retinde mańyzdy ról atqara alady. Qazaqstan Shyǵys pen Batys arasyndaǵy kópir bola alady. Táýelsizdik alǵan sátten bastap bul eldiń damýyn baqylaý qyzyq boldy. 20 millionǵa jýyq halqy bar memleket tabiǵi resýrstarǵa, ásirese munaiǵa, gazǵa jáne kómirge bai. Eldiń geografiialyq aýqymy búkil Batys Eýropaǵa para-par. Shekarasy Qytai men Resei siiaqty qýatty kórshilermen shektesedi», - dep jazady saiasatker.
Sondai-aq, ol Qazaqstan úshin táýelsizdiktiń 30 jyldyǵy ótkenge esep berip, keleshekke jańa baǵdar izteitin jaýapty kezeń degen paiym aitady.
«Qazaqstan táýelsizdiginiń 30 jyldyǵy – bul eldiń qol jetkizgen nátijeleri men álemdik arenada atqaratyn rólin eske salýdyń múmkindigi. Bul sonymen qatar Qazaqstanǵa Eýropamen demkoratia jáne adam quqyqtaryn nyǵaitý jolynda kúsh biriktirip, sol arqyly Ortalyq Aziiany jáne búkil álemdi qaýipsizdik jolynda yntymaqtastyqqa shaqyrýǵa múmkindik beredi», - deidi Norvegiianyń Hristian-demokratiialyq partiiasynyń jetekshisi.
