Búgin, 29 tamyzda Atyraý qalasynda “Bilimdi el – máńgilik el” atty Atyraý oblysy bilim berý qyzmetkerleriniń tamyz keńesi ótti, - dep habarlaidy "Ult aqparat".
Keńeske Atyraý oblysynyń ákimi Nurlan Noǵaev, Qazaqstan Respýblikasy Bilim jáne ǵylym ministrligi joǵary oqý ornynan keiingi bilim departamenti direktorynyń orynbasary Ahmed-Zaki Darhan, oblystyq bilim berý basqarmasynyń basshysy Sailaýova Nursáýle jáne oblys ustazdary qatysty.
Shara barysynda jinalǵandar balalardy mektepke daiyndaý negizderin, “Saýat ashý” pánin oqytý máselelerin, pedagog kadrlardy daiarlap shyǵarýdaǵy mektep pen ýniversitettiń bailanysy talqylandy.
Jiynda sóz alǵan Atyraý oblysynyń ákimi memleket tarapynan ustazdar men shákirtterge jasalǵan qamqorlyqty tilge tiek ete otyryp, qordalanǵan máselelerdi ashyq talqylaýǵa shaqyrdy. Aita ketelik, biyl aimaq basshysynyń tapsyrmasymen oblystaǵy bastaýysh synyp oqýshylary túgel tegin ystyq tamaqpen qamtamasyz etiletin boldy. Bul – 48 145 oqýshy. Osy maqsatta oblystyq biýdjetten 1 milliard teńge bólingen.
“Tek bul emes. Oblystaǵy mektepterdiń bárine jańa partalar jáne 3000 kompiýter satyp alyndy. Igi shara oqýshynyń alańsyz bilim alyp, zerdeli azamat bolyp shyǵýyna septigin tigizbek”, – dedi Nurlan Noǵaev.
Oblys ákimi sonymen qatar muǵalimderdiń bedeli týraly sóz qozǵady. Onyń aitýynsha, ustazdardyń bedeliniń tómendep ketýi qoǵamdy alańdatýy kerek.
“Muǵalimdi syilaý kerek ekenin balalarymyzǵa aityp otyramyz. Biraq kei-kezderi isimizben ustazdardyń dárejesin qurmettemeitinimizdi kórsetip alyp jatamyz. Muǵalimdi syilaýdyń úlgisin ata-analar birinshi bolyp ózderi bildirýi kerek. “Balańdy aiaǵanyń – aiamaǵanyń” deidi danalar. Ustazdyń qamqorlyǵyn sezinip, qajet kezde eskertýi men synyn tyńdap ósken bala esti bolady”, – dedi aimaq basshysy.
Nurlan Noǵaev sonymen qatar, balalardy tek akademiialyq bilimge emes, rýhani bailyq jinaýǵa baýlý kerek ekenin aitty. Ol bul jolda muǵalimdermen birge ata-analardyń da eńbegi qajet ekenin eskertti.
Keńes sońynda eńbegi sińgen ustazdarǵa “Qazaqstan Respýblikasy Bilim berý isiniń qurmetti qyzmetkeri” jáne Bilim jáne ǵylym ministrliginiń «Y.Altynsarin» tósbelgileri, alǵys hattar tabystaldy. Sonymen qatar, Ulttyq biryńǵai testileýden joǵary dáreje kórsetken bilim ordalarynyń basshylaryna baǵaly syilyqtar usynyldy.
Aita ketelik, qazir Atyraý oblysynda 162 balabaqsha, 192 mektep, 25 tehnikalyq jáne kásiptik bilim berý uiymy jumys isteidi. 2016 jyldyń birinshi jartyjyldyǵynda “Balapan” baǵdarlamasy aiasynda oblysta 5 balabaqsha ashylsa, 9 balabaqshanyń qurylysy júrip jatyr. Biyl mektepdiń bárine jóndeý jasaldy. Bilim berý salasynda oblysta 11639 pedaogog jumys isteidi.
