Ortalyq kommýnikatsiialar qyzmetinde ótken brifingide Mańǵystaý oblysynyń ákimi Nurlan Noǵaev óńirde ashylǵan qant zaýyty nege jumys istemei turǵanyn aitty, dep habarlaidy QazAqparat.
«Endi bul - jeke kásipkerdiń atqaryp otyrǵan isi. Ózińiz bilesiz, qandai da bir sharýany atqarý úshin bárin jan-jaqty úilestirý kerek. Bizdiń tabiǵi erekshelikterimiz qyzylsha egýge kelmeidi. Biraq biz oǵan joq demedik. Sol kásipker ózi qant shyǵarýǵa syrttan shikizat ákeletinin aityp, niet tanytty. Biz óz tarapymyzdan qoldaý kórsettik. Biznesti qoldaý sharalarynyń aiasynda qarjylyq, ákimshilik kómek berdik. Ózim de investormen birneshe ret kezdestim. Degenmen qazirgi tańda is júrmei tur. Bul – biznes. Bastaǵan isiń josparlaǵandai júrip ketse, quba-qup. Ókinishke qarai, obektivti, sýbektivti sebepter bar», - dedi Nurlan Noǵaev.
Sondai-aq, ol Jańaózende barlanǵan munaidyń qazirgi qory qosymsha zaýyt ashýǵa múmkindik bermeitinin basa aitty.
«Báriniń talap etip otyrǵany bir zaýyt ashsa, jumyssyzdardyń bári sol jerge kiredi ǵoi degenge saiady. Kei kezderi bul – múmkin emes sharýa. Mamandardyń aitýy boiynsha, jerasty izdestirý jumystaryna investitsiia salynbasa, Jańaózen ken ornynyń qory 25-30 jylǵa jetetinin aityp otyr», - dedi ákim.
Eske salsaq, keshe QR Májilis depýtaty Edil Jańbyrshin Úkimet basshysy Álihan Smaiylovtyń atyna Mańǵystaý oblysyndaǵy eńbekdaýlary týraly saýal joldadǵan edi.
