Ádebiet salasyndaǵy Nobel syilyǵynyń laýreaty Toni Morrison 88 jasynda qaitys boldy. Morrisonnyń ómirden ozǵanyn baspager Alfred Knopf rastady, dep habarlaidy Associated Press.
Jazýshy Niý-Iork meditsinalyq ortalyǵynda kóz jumdy.
Toni Morrison (Hloia Ardeliia Ýofford) 1931 jyly Ogaio shtatynda dúniege kelgen. Ýniversitetti aiaqtaǵan soń aǵylshyn tili jáne ádebieti pániniń ustazy, baspa redaktory bolyp qyzmet atqarǵan. Alǵashqy «Kókpeńbek kóz» romanyn 1970 jyly jazyp shyqty. 1988 jyly «Beloved» romany úshin Pýlittser syilyǵyn ielengen. 1993 jyly jazýshy retinde Nobel syilyǵyn alǵan alǵashqy qara násildi áiel atandy. Ol - óziniń arman men poeziiaǵa toly romanynda amerikalyq shyndyqtyń mańyzdy qyryn jandandyra bilgen jazýshy.
