Elordadaǵy «Qazaqstan» ortalyq kontsert zalynda avstraliialyq áigili motivator, metsenat Nik Výichich trening ótkizdi, dep habarlaidy QazAqparat.
Aiaq-qolsyz kembaǵal týyp, myqty kúsh-jigeriniń arqasynda álemge tanymal adamdardyń qataryna engen, 70 elde orator retinde sheberlik saǵattaryn ótkizgen áigili Nik Výichichtiń tyńdarmandary elordada da barshylyq eken. «Qazaqstan» kontsert zalynyń 3,5 myń oryndyq zalyna adam lyq toldy. Solardyń ortasynda qala ákimi Altai Kólginov te boldy.
«Álemge tanymal, aldaǵy 5 jylynyń ár kúni josparlanǵan tanymal motivatorlardyń elordaǵa kelýine yqpal etken uiymdastyrýshylarǵa alǵys aitqym keledi. Búgingi sheberlik-sabaǵynyń taqyryby «Jalqaýlyqqa jol joq» degen maǵynada alynypty. Osy sharadan keiin Nur-Sultanda jalqaýlyqtan qoryqpaityn adamdardyń sany 3,5 myńǵa kóbeiedi degen úmit bar. Bizdiń memlekettik qyzmetshilerge de osyndai motivatsiialyq sharalar qajet-aq», - dedi kesh qonaǵy Nik Výichichti sahnaǵa shaqyrǵan Altai Kólginov.
Avstraliialyq sheshen birden jumysyna kiristi.
«Men kelesi joly Qazaqstanǵa otbasymmen kelsem degen oi túidim. Álemniń 70 elinde bolǵanyma qýanamyn. Zalda múgedek arbasyna tańylǵan adamdardyń bar ekenin kórip turmyn. Bireýler týǵannan jarymjan bolsa, bireýler apatqa ushyrap, bireýler syrqat saldarynan osyndai kúige túsken shyǵar. Negizi týa múgedek bolýdan aiaq-qolyńdy orta jolda joǵaltý áldeqaida aýyr. Biraq jer betindegi adamnyń eshqaisysynyń tórt qubylasy teń emes. Meniń aýdarmashym bolyp turǵan Vladimirge qarańyzdarshy. Bir qarasańyz aiaq-qoly saý, túri-basy minsiz bolyp kórinýi múmkin. Keide syrty bútin adamnyń jan-dúniesi kemtar bolyp jatady. Sondyqtan óz bolmysyńyzdy kemshilik dep qabyldamańyz», - dep bastaǵan orator bailyq, meiirim, ádildik týrasynda oi qozǵady.
«Men alǵash týǵanda dárigerler ata-anamnan keshirim surap, meniń eshqashan júre almaitynymdy aitypty. Kórip otyrsyzdar, men júre alam. Iaǵni adamnyń taǵdyryna tek ózi ǵana úkim aita alady», - dedi Nik Výichich.
Zal toly halyqty bir saǵattan astam ýaqyt boiy jigerli sózimen baýraǵan áigili meimannyń tosyn ári týra aitylǵan sózderine tyńdarmandar qaita-qaita qol soqty. Olardyń bir bóligi áserli sózderdi uialy telefondarynyń kamerasyna jazyp jatsa, daiyndyqpen kelgenderi qoiyn dápterlerine qalammen túrtip alyp otyrdy.
Nik Výichich:
«Men kóptegen bailardyń aldynda sóz sóilep, jiger berdim. Syrt kózge olardyń muqtajdyǵy joq bolyp kórinedi. Biraq olardyń kóbi baqytqa muqtaj».
«Sońǵy ret qashan jaqynyńyzǵa ony jaqsy kóretinińizdi aittyńyz? Sońǵy ret qashan jubaiyńyzdy keshki asqa apardyńyz? Sońǵy ret qashan anańyzǵa gúl syiladyńyz? Sońǵy ret qashan ulyńyzǵa ony maqtan tutatynyńyzdy aittyńyz? Eger esińizge túsire almasańyz, sony búgin isteńiz!».
«Ahýal degenimiz – múmkindik. Tańǵajaiyp bola bil. Ózińizge ekinshi múmkindik berýden tartynbańyz. Eger isherge as tappai qalsańyz, azyqqa muqtaj tiri jan ekenińizge shúkirshilik etińiz. Al as tabylǵanda oǵan qoly jetpei júrgenderdi eske alyńyz. Azdap dáýlet paida bolsa, kedeilerdi umytyp ketpeńiz. Ómir bólisýmen mándi. Ómir bólisýden turady. Sonda sarań bai da, ashýshań kedei de bolmaidy. Áielim ekeýimiz 15 jetim balaǵa demeýshi bolyp kelemiz. Óz balalarymyz olarǵa jyly sózdermen hat jazady. Osy arqyly biz olardy adamdyqqa baýlyp júrmiz».
«Qazaqstan, eshqashan berilmeńder! Eger siz memleketińiz jomart bolǵanyn qalasańyz, ózińiz de sarań bolmańyz. Qolyńyzda dáýlet bolmasa, paidaly aqparatpen, bilimińizben, jaǵymdy emotsiiańyzben bólisińiz. Eger siz ádildik ornasyn deseńiz, ózińizdi ár jaǵdaida ádil ustańyz. Mańaiyńyzda adaldyq bolǵanyn qalaisyz ba, ózińiz sol adaldyqqa ainalyńyz.
Jaqyndaryńyzdyń keshirimdi bolǵanyn qalaisyz ba, keshirimge ainalyńyz. Álem de, halyq ta, otbasyńyz da bir sátte ózgermeidi. Bári saty-satymen, qadam-qadammen ornyna keledi. Tek sol ózgeristiń bólshegi bolýǵa asyǵyńyz».
