Rio olimpiadasynda 77 kilogrammda álem rekordyn ornatyp, altyn medal alǵan qazaqstandyq aýyr atlet Nijat Rahimov Azattyq tilshisine dopingten taza ekenin aitty.
- Men - tazamyn. Basqa aitylyp jatqan sózderge mán bermeimin, - dedi Rahimov.
Rahimov Rioda altyn alǵannan keiin onyń qarsylastarynyń biri, qola medal ielengen egipettik Mohammed Mahmýd "doping tekseristen keiin ózgerister (medal iegerleri boiynsha - red.) bolýy múmkin. Qysqa ýaqyttyń ishinde osyndai salmaqty kóterý múmkin emes" degen.
Ulttyq olimpiada komitetiniń málimdeýinshe, Rio olimpiadasy aldynda Qazaqstan sportshylary Germaniiadaǵy zerthanada doping tekserisinen ótip, barlyǵy taza bolǵan.
Nijat Rahimov 2013 jyly Ázerbaijan quramasynda júrgende dopingpen ustalyp, eki jyl jazasyn ótegen soń 2015 jyly sportqa qaita oralǵan. Ol sportqa qaita oralǵan soń 2015 jyly Qazaqstan atynan Hiýstondaǵy álem chempionatynda altyn júlde alǵan.
Rahimov Rio olimpiadasynda julqa kóterýden keiin qytailyq atlet Liýi Siaotsziannan 12 kilogramm utylyp turǵan. Sosyn serpe kóterýde rekordtyq 214 kilogramdy kóterip, chempion atandy.
Qazir Qazaqstan quramasynyń Rio olimpiadasynyń eki altyn, eki kúmis, úsh qola medali bar. Rahimovtan bólek júzýden Dmitrii Balandin altyn aldy. Jazira Japparqul (aýyr atletika) pen Eldos Smetov (dziýdo) kúmis medal enshilegen. Galbadrah Otgontsetseg (dziýdo), Karina Goricheva men Farhad Harki (ekeýi de - aýyr atletika) qola medal ielengen. Qazaqstan 11 tamyzdaǵy komandalyq esepte 11-orynda tur.
Rýslan Medelbek, Azattyq
