Beisenbi kúni Niderlandyda adamnyń betin jaýyp turatyn kiimdi kiiýge tyiym salatyn zań shyqty, dep habarlaidy NL Times agenttigi.
Búginnen bastap memlekettik mekemelerde, oqý ǵimarattarynda, densaýlyq saqtaý mekemeleri men qoǵamdyq kólikterde bet-álpetti jaýyp turatyn kiim kiiýge bolmaidy.
Paranja men nikabqa ǵana emes, sondai-aq, betti túgeldei jaýyp turatyn mototsikl shlemderi men balaklavaǵa tyiym salyndy. Eger azamat zań talabyna sáikes betin ashýdan bas tartatyn bolsa, oǵan kórsetilgen qoǵamdyq oryndarǵa kirýge tyiym salynýy nemese 150 evro kóleminde aiyppul salynýy múmkin.
Kóshede áli de bolsa mundai kiimdi kiip júrýge bolady, alaida politsiia tulǵanyń túr-sipatynyń sáikestigin tekserý úshin betin ashýyn suraýy múmkin.
Paranjaǵa tyiym salý týraly alǵashqy zań jobasy niderlandy parlamentine 14 jyl buryn engen edi, alaida kemsitýshilik sipatqa ie bolǵandyqtan, qoldaý tapqan joq.
Adamnyń betin tutastai jaýyp turatyn kiimge tyiym salý týraly qazirgi zańdy ótken jyldyń maýsym aiynda gollandiialyq parlamentarii qoldaǵan bolatyn. Sol ýaqyttan beri bul zańdy iske qosý tásili uzaq ýaqyt talqylanǵan edi.
